ტორასემიდი - Torasemid 5მგ 30 ტაბლეტი
აღწერა
ტორასემიდი სტადა 5 მგ ტაბლეტები EFG
მედიკამენტის მიღების დაწყებამდე ყურადღებით წაიკითხეთ გამოყენების ინსტრუქცია
- შეინახეთ გამოყენების ინსტრუქცია. შესაძლოა, ხელახლა დაგჭირდეთ მისი წაკითხვა.
- თუ გაგიჩნდებათ რაიმე შეკითხვა, მიმართეთ ექიმს ან ფარმაცევტს.
- ეს მედიკამენტი თქვენთვისაა დანიშნული და არ უნდა მისცეთ იგი სხვებს, თუნდაც მათ იგივე სიმპტომები ჰქონდეთ, რადგან შესაძლებელია საზიანო აღმოჩნდეს მათთვის.
- თუ თვლით, რომ თქვენს მიერ განცდილი რომელიმე გვერდითი მოვლენა სერიოზულია, ან თუ შეამჩნევთ რაიმე გვერდით მოვლენას, რომელიც არ არის ჩამოთვლილი ამ გამოყენების ინსტრუქციაში, აცნობეთ ამის შესახებ ექიმს ან ფარმაცევტს.
გამოყენების იბსტრუქციის შინაარსი:
1. რას წარმოადგენს ტორასემიდი სტადა 5 მგ ტაბლეტები EFG და რისთვის გამოიყენება
2. ტორასემიდი სტადა 5 მგ ტაბლეტები EFG-ის მიღებამდე
3. როგორ მივიღოთ ტორასემიდი სტადა 5 მგ ტაბლეტები EFG
4. შესაძლო გვერდითი მოვლენები
5. როგორ შევინახოთ ტორასემიდი სტადა 5 მგ ტაბლეტები EFG
6. დამატებითი ინფორმაცია
1. რას წარმოადგენს ტორასემიდი სტადა 5 მგ ტაბლეტები EFG და რისთვის გამოიყენება
ტორასემიდი სტადა არის >შარდმდენი საშუალება (ზრდის შარდის გამოყოფას) და მიეკუთვნება ე.წ. „ძლიერი მოქმედების შარდმდენების ჯგუფს, როგორიცაა: სულფონამიდები, მონოპრეპარატიანი შარდმდენები“.
ტორასემიდი სტადა განკუთვნილია შემდეგი დაავადებების სამკურნალოდ:
- შეშუპება (სითხის შეკავება) გამოწვეული გულის შეგუბებითი უკმარისობით, თირკმელების ან ღვიძლის დაავადებით,
- ჰიპერტენზია.
ასევე, იხილეთ: >ტორასემიდი - Torasemid 10მგ 30 ტაბლეტი
2. ტორასემიდი სტადა 5 მგ ტაბლეტების მიღებამდე
არ მიიღოთ ტორასემიდი სტადა EFG:
- თუ გაქვთ ალერგია (ჰიპერმგრძნობელობა) ტორასემიდის ან ტორასემიდი სტადას რომელიმე სხვა კომპონენტის მიმართ;
- თუ გაქვთ ალერგია სულფონილშარდოვანას მიმართ;
- თუ გაქვთ ანურია (შარდის გამოყოფის არარსებობა).
გამოიჩინეთ განსაკუთრებული სიფრთხილე ტორასემიდი სტადას გამოყენებისას:
- თუ გაქვთ ღვიძლის მძიმე დაავადება, რადგან ტორასემიდის გამოყენებამ შეიძლება გამოიწვიოს კომა;
- თუ გაქვთ სისხლში ნატრიუმის ან კალიუმის დაბალი დონე ან უჩივით სისხლის მოცულობის შემცირებას;
- თუ გაქვთ გულის პრობლემები, განსაკუთრებით თუ მკურნალობთ დიგიტალის გლიკოზიდებით, რადგან ეს ზრდის გულის არითმიების რისკს;
- თუ გაქვთ პოდაგრა ან შაქრიანი დიაბეტი;
- თუ გაწუხებთ თირკმელების უკმარისობა ან გაქვთ შარდვის პრობლემები;
- თუ გაქვთ დაბალი არტერიული წნევა (ჰიპოტენზია).
სხვა მედიკამენტების გამოყენება
აცნობეთ ექიმს ან ფარმაცევტს, თუ იღებთ ან ბოლო დროს მიიღეთ სხვა მედიკამენტები, მათ შორის ურეცეპტოდ გაცემული მედიკამენტები.
ასევე უნდა აცნობოთ ექიმს, თუ იღებთ რომელიმე შემდეგ მედიკამენტს, რომლებთანაც ტორასემიდი შეიძლება ურთიერთქმედებდეს:
- საგულე გლიკოზიდები, როგორიცაა დიგოქსინი (მედიკამენტები გულისთვის), ანტიჰიპერტენზიული საშუალებები (განსაკუთრებით აგფ ინჰიბიტორები), თეოფილინი (ასთმის სამკურნალო პრეპარატი): ამ მედიკამენტების ეფექტი შეიძლება გაძლიერდეს;
- მინერალოკორტიკოიდები, გლუკოკორტიკოიდები და საფაღარათო საშუალებები: შეიძლება გაზარდოს ამ მედიკამენტებით გამოწვეული კალიუმის გამოყოფა;
- ამინოგლიკოზიდების ჯგუფის ანტიბიოტიკები: შეიძლება გაზარდოს ტოქსიკურობა თირკმელების ან სმენის მხრივ;
- ცისპლატინი (კიბოს სამკურნალო პრეპარატი), ლითიუმი (ანტიდეპრესანტი), სალიცილატები, ეტაკრინის მჟავა: შეიძლება გაზარდოს მათი ტოქსიკურობა;
- არასტეროიდული ანთების საწინააღმდეგო პრეპარატები (მაგ., იბუპროფენი, ინდომეტაცინი), პრობენეციდი (პოდაგრის საწინააღმდეგო პრეპარატი), ქოლესტირამინი (სისხლში ქოლესტერინის დონის შესამცირებლად გამოყენებული პრეპარატი): შეიძლება შეამციროს ტორასემიდის ეფექტი;
- დიაბეტის სამკურნალო მედიკამენტები: შესაძლოა მათი ეფექტი შემცირდეს.
ტორასემიდი სტადას მიღება საკვებთან და სასმელთან ერთად
ტაბლეტების მიღება შესაძლებელია საკვებთან ერთად ან მის გარეშე.
ორსულობა და ძუძუთი კვება
ნებისმიერი მედიკამენტის გამოყენებამდე გაიარეთ კონსულტაცია ექიმთან ან ფარმაცევტთან.
ორსულობის დროს ტორასემიდის გამოყენება რეკომენდებული არ არის.
უცნობია, გადადის თუ არა ტორასემიდი დედის რძეში, ამიტომ მისი გამოყენება ძუძუთი კვების დროს არ არის რეკომენდებული.
გამოყენება ბავშვებში
ვინაიდან ბავშვებში ტორასემიდის უსაფრთხოება და ეფექტურობა დადგენილი არ არის, ბავშვებში ტორასემიდის გამოყენება რეკომენდებული არ არის.
მანქანის მართვა და მექანიზმების გამოყენება
ამ მედიკამენტმა შეიძლება შეაფერხოს თქვენი მანქანის მართვის და მექანიზმებთან მუშაობის უნარი, განსაკუთრებით თუ ის მიიღეთ ალკოჰოლთან ერთად.
მნიშვნელოვანი ინფორმაცია ტორასემიდი სტადას ზოგიერთი კომპონენტის შესახებ:
ეს მედიკამენტი შეიცავს ლაქტოზას. თუ ექიმმა გითხრათ, რომ გაქვთ ზოგიერთი შაქრის აუტანლობა, აღნიშნული მედიკამენტის მიღებამდე გაიარეთ კონსულტაცია ექიმთან.
ეს მედიკამენტი შეიცავს 23 მგ-ზე (1 მმოლ) ნაკლებ ნატრიუმს თითო ტაბლეტზე; ანუ, ფაქტობრივად, „ნატრიუმის გარეშეა“.
3. როგორ მივიღოთ ტორასემიდი სტადა 5 მგ ტაბლეტები EFG
ტორასემიდი სტადას მიღების შესახებ ზუსტად დაიცავით ექიმის მითითებები. ნებისმიერი შეკითხვის შემთხვევაში მიმართეთ ექიმს ან ფარმაცევტს.
ზრდასრულებისთვის (ხანდაზმულების ჩათვლით) ჩვეულებრივი დოზაა:
- გულის შეგუბებით უკმარისობასთან, თირკმელების დაავადებასთან ან ღვიძლის დაავადებასთან დაკავშირებული შეშუპების მკურნალობა
საწყისი დოზა მერყეობს 5 მგ-დან 20 მგ-მდე დღეში, მაგრამ საჭიროების შემთხვევაში ექიმმა შეიძლება გაზარდოს ეს რაოდენობა დაახლოებით ორჯერ.
- ჰიპერტენზია
ჩვეულებრივი საწყისი დოზაა 2.5-დან 5 მგ-მდე დღეში, მაგრამ ექიმმა შეიძლება გაზარდოს დღიური დოზა 10 მგ-მდე ან დანიშნოს დამატებითი ანტიჰიპერტენზიული საშუალება.
ტორასემიდი სტადა მიიღება პერორალურად.
ტაბლეტები გადაყლაპეთ, დაღეჭვის გარეშე, საკმარისი რაოდენობით სითხესთან ერთად დილით. ტაბლეტების მიღება შესაძლებელია საკვებთან ერთად ან მის გარეშე.
თუ მიიღეთ საჭიროზე მეტი ტორასემიდი სტადა
თუ მიიღეთ საჭიროზე მეტი ტორასემიდი სტადა, შეიძლება გამოყოთ უფრო მეტი შარდი და იგრძნოთ მომატებული ძილიანობა, დაბნეულობა, სისუსტე და თავბრუსხვევა.
დოზის გადაჭარბების ან შემთხვევით გადაყლაპვის შემთხვევაში, დაუყოვნებლივ მიმართეთ ექიმს ან ფარმაცევტს ან დარეკეთ ტოქსიკოლოგიურ ცენტრში ნომერზე 91 562 04 20, მიღებული წამლისა და რაოდენობის მითითებით.
თუ დაგავიწყდათ ტორასემიდი სტადას მიღება
არ მიიღოთ ორმაგი დოზა გამოტოვებული დოზის ასანაზღაურებლად.
იმ დღეს მიიღეთ საჭირო დოზა როგორც კი გაგახსენდებათ და მეორე დღეს მიიღეთ დანიშნულ დროს.
თუ შეწყვეტთ ტორასემიდი სტადას მიღებას
თქვენი ექიმი გეტყვით, რამდენ ხანს უნდა გააგრძელოთ ტორასემიდი სტადას მიღება. არ შეწყვიტოთ მკურნალობა ექიმის დანიშნულებამდე, რადგან ამან შეიძლება გააუარესოს თქვენი მდგომარეობა.
თუ გაქვთ დამატებითი კითხვები ამ პროდუქტის გამოყენებასთან დაკავშირებით, მიმართეთ ექიმს ან ფარმაცევტს.
4. შესაძლო გვერდითი მოვლენები
ყველა მედიკამენტის მსგავსად, ტორასემიდი სტადა 5 მგ-მა შეიძლება გამოიწვიოს გვერდითი მოვლენები, თუმცა ისინი ყველას არ უვითარდება.
დამახასიათებელია შემდეგი გვერდითი მოვლენები:
- ხანგრძლივი მკურნალობის დროს შეიძლება განვითარდეს სითხისა და მარილის ბალანსის დარღვევები.
- ზოგჯერ, განსაკუთრებით მკურნალობის დასაწყისში, შეიძლება განვითარდეს თავის ტკივილი, თავბრუსხვევა, დაღლილობა, სისუსტე, კუნთების სპაზმები და კუჭ-ნაწლავის დისკომფორტი (მაგ., მადის დაკარგვა, მუცლის ტკივილი, გულისრევა, ღებინება, დიარეა, ყაბზობა).
- იშვიათ შემთხვევებში, შეიძლება განვითარდეს პირის სიმშრალე და დისკომფორტი კიდურებში. ცალკეულ შემთხვევებში, შეიძლება განვითარდეს მხედველობის დარღვევები და ალერგიული რეაქციები (მაგ., წვა, სიწითლე, ფოტომგრძნობელობა).
- პაციენტებში, რომლებსაც უჭირთ შარდვა (მაგ., გადიდებული პროსტატის გამო), შარდის ნაკადის გაზრდამ შეიძლება გამოიწვიოს შარდის შეკავება.
- შარდის გამოყოფის გაზრდის გამო, შეიძლება განვითარდეს არტერიული წნევის ვარდნა, დაბნეულობა და, იშვიათად, თრომბოზი, გულის რიტმის დარღვევები, სტენოკარდია, მწვავე მიოკარდიუმის ინფარქტი, გონების უეცარი დაკარგვა (სინკოპე) და სისხლის მიმოქცევის კოლაფსი, განსაკუთრებით თუ დიდი რაოდენობით სითხე და მარილი დაიკარგა.
- ზოგჯერ აღინიშნება სისხლში შარდმჟავას, შაქრის, ტრიგლიცერიდების და ქოლესტერინის დონის მომატება.
თუ რომელიმე გვერდითი მოვლენა სერიოზულად მიგაჩნიათ, ან თუ შეამჩნევთ რაიმე გვერდით მოვლენას, რომელიც არ არის ჩამოთვლილი ამ გამოყენების ინსტრუქციაში, გთხოვთ, აცნობოთ ამის შესახებ თქვენს ექიმს ან ფარმაცევტს.
5. ტორასემიდი სტადა 5 მგ ტაბლეტები EFG-ის შენახვა
შეინახეთ ბავშვებისთვის მიუწვდომელ ადგილას.
არ შეინახოთ 30°C-ზე მაღალ ტემპერატურაზე. შეინახეთ ორიგინალ შეფუთვაში.
არ გამოიყენოთ ტორასემიდი სტადა შეფუთვაზე მითითებული ვარგისიანობის ვადის გასვლის შემდეგ, რომელიც მითითებულია „ვარგისიანობის ვადა“-ს შემდეგ. აღნიშნული ვადა გულისხმობს მითითებული თვის ბოლო დღეს.
წამლები არ უნდა გადაყაროთ ჩამდინარე წყლებში ან საყოფაცხოვრებო ნარჩენებში. მიმართეთ ფარმაცევტს, თუ როგორ უნდა გადააგდოთ ზედმეტი წამლები. ეს ზომები ხელს შეუწყობს გარემოს დაცვას.
6. დამატებითი ინფორმაცია
რას შეიცავს ტორასემიდი სტადა
- აქტიური კომპონენტია ტორასემიდი
- სხვა კომპინენტებია ლაქტოზის მონოჰიდრატი, სიმინდის სახამებელი, ნატრიუმის კარბოქსიმეთილის სახამებელი (ტიპი A) (კარტოფილისგან), კოლოიდური უწყლო სილიციუმი და მაგნიუმის სტეარატი.
პროდუქტის გარეგნობა და შეფუთვის შიგთავსი
ტორასემიდი სტადა 5 მგ არის მრგვალი, ორმხრივად ამობურცული, თეთრი ან მოთეთრო ტაბლეტები, ერთ მხარეს ნაჭდევით და მეორე მხარეს 915 მონიშვნით.
ის წარმოდგენილია 30 ტაბლეტიან შეფუთვაში.
გაცემის წესი:
ფარმაცევტული პროდუქტის ჯგუფი II, გაიცემა ფორმა №3 რეცეპტით.