ოქტიზი გელი - Octizy Gel 30გ

ოქტიზი® 1 მგ/გ + 10 მგ/გ გელი

ოქტენიდინის დიჰიდროქლორიდი/ფენოქსიეთანოლი

ამ პრეპარატის გამოყენების დაწყებამდე ყურადღებით გაეცანით ინსტრუქციას, რადგან ის შეიცავს თქვენთვის მნიშვნელოვან ინფორმაციას.

ყოველთვის გამოიყენეთ ეს პრეპარატი ზუსტად ისე, როგორც აღწერილია ამ ინსტრუქციაში ან ექიმის ან ფარმაცევტის დანიშნულების შესაბამისად.

- შეინახეთ ინსტრუქცია. შესაძლოა, თქვენ ხელახლა დაგჭირდეთ მისი წაკითხვა.

- დამატებითი ინფორმაციის ან რჩევის საჭიროების შემთხვევაში მიმართეთ ფარმაცევტს.

- თუ შეამჩნევთ რაიმე გვერდით ეფექტს, მიმართეთ ექიმს ან ფარმაცევტს. ეს ეხება ნებისმიერ შესაძლო გვერდით ეფექტს, რომელიც არ არის ჩამოთვლილი ამ ინსტრუქციაში. იხილეთ მე-4 პუნქტი.

- აუცილებლად მიმართეთ ექიმს, თუ თავს უკეთ არ გრძნობთ ან 2 კვირის შემდეგ გრძნობთ გაუარესებას.

 რა შედის ამ ფურცელ-ჩანართში

1. რა არის ოქტიზი გელი და რისთვის გამოიყენება

2. რა უნდა იცოდეთ ოქტიზი გელის გამოყენებამდე

3. როგორ გამოვიყენოთ ოქტიზი გელი

4. შესაძლო გვერდითი ეფექტები

5. როგორ შევინახოთ ოქტიზი გელი

6. შეფუთვის შიგთავსი და სხვა ინფორმაცია

1.რა არის ოქტიზი გელი და რისთვის გამოიყენება

ოქტიზი გელი შეიცავს აქტიურ ნივთიერებებს ოქტენიდინის დიჰიდროქლორიდს - ანტისეპტიკურ და სადეზინფექციო საშუალებას და ფენოქსიეთანოლს, ბაქტერიციდულ საშუალებას.

ის გამოიყენება კანზე, მცირე და ზედაპირული ჭრილობების განმეორებითი, დროში შეზღუდული, შემანარჩუნებელი >ანტისეპტიკური მკურნალობისთვის ყველა ასაკობრივი ჯგუფის პაციენტებში.

იხილეთ ბლოგი: >ოქტიზი – თანამედროვე ანტისეპტიკური საშუალება თქვენი ოჯახისთვის

2.რა უნდა იცოდეთ ოქტიზი გელის გამოყენებამდე

არ გამოიყენოთ ოქტიზი გელი:

·   თუ გაქვთ ალერგია ოქტენიდინის დიჰიდროქლორიდის, ფენოქსიეთანოლის ან ამ პრეპარატის სხვა რომელიმე ინგრედიენტის მიმართ (ჩამოთვლილია მე-6 პუნქტში).

·   ეს პრეპარატი არ უნდა იქნას გამოყენებული მუცლის ღრუს (მაგ. ოპერაციის დროს [ინტრაოპერაციული]), შარდის ბუშტის ან დაფის აპკის გამოსარეცხად.

გაფრთხილებები და უსაფრთხოების ზომები

ოქტიზი გელის გამოყენებამდე მიმართეთ ექიმს, ფარმაცევტს ან ექთანს.

არ გამოიყენოთ სამკურნალო პროდუქტი საჭიროზე დიდი რაოდენობით, არ გადაყლაპოთ ის და არ დაუშვათ მისი სისხლში მოხვედრა, მაგ. შემთხვევითი ინექციის გზით.

ქსოვილების შესაძლო დაზიანების თავიდან ასაცილებლად, ამ პრეპარატის გამოყენებისას სიფრთხილეა საჭირო, რათა დარწმუნდეთ, რომ პროდუქტი არ გამოიყენება ზეწოლით ან არ შეჰყავთ ქსოვილში.

ღრუ ჭრილობების შემთხვევაში (უფრო დიდი, ღრმა ჭრილობები კანქვეშა ქსოვილის დაკარგვით), უნდა იყოს უზრუნველყოფილი ჭრილობის სითხის დინება (მაგალითად, დრენაჟი ან ჭრილობის დამუშავების სპეციალური ტექნიკა /ე.წ. კანის ფლაპი/).

არ გამოიყენოთ ოქტიზი გელი თვალში. თვალებთან კონტაქტის შემთხვევაში, დაუყოვნებლივ ჩამოიბანეთ დიდი რაოდენობით წყლით.

ბავშვები

სიფრთხილით გამოიყენეთ ახალშობილებში, განსაკუთრებით ნაადრევად დაბადებულებში. ოქტიზი გელმა შეიძლება გამოიწვიოს კანის სერიოზული დაზიანებები. მოაშორეთ ზედმეტი პროდუქტი და დარწმუნდით, რომ გელი კანზე საჭიროზე მეტხანს არ რჩება (მათ შორის, პაციენტთან უშუალო კონტაქტში მყოფი გელის წვეთოვანი მასალები).

6 წლამდე ასაკის ბავშვებში ოქტიზი გელის გამოყენება უნდა შემოიფარგლოს რამდენიმე დღით.

სხვა პრეპარატები და ოქტიზი გელი

აცნობეთ ექიმს ან ფარმაცევტს, თუ იყენებთ ან ცოტა ხნის წინ გამოიყენეთ სხვა პრეპარატები, მათ შორის რეცეპტის გარეშე გასაცემი.

არ გამოიყენოთ ეს პრეპარატი პოვიდონ-იოდის ბაზაზე დაფუძნებულ კანის სადეზინფექციო საშუალებებთან ერთად კანის უბნების დასახურავად, რადგან ამან შეიძლება გამოიწვიოს კანის ძლიერი ყავისფერი ან იისფერი შეფერილობა.

არ გამოიყენოთ ოქტიზი გელი ანიონურ ტენზიდებთან (მაგალითად, საპონი, სარეცხი ან საწმენდი საშუალებები) ერთად, რადგან ეს იწვევს ამ წამლის ანტიმიკრობული ეფექტურობის შეზღუდვას ან დაკარგვას.

ორსულობა და ძუძუთი კვება

თუ ხართ ორსულად ან ძუძუთი კვებავთ ბავშვს, ფიქრობთ, რომ შეიძლება იყოთ ორსულად ან გეგმავთ ბავშვის გაჩენას, ამ პრეპარატის გამოყენებამდე მიმართეთ ექიმს ან ფარმაცევტს.

ორსულობა

ორსულობის დროს ოქტიზი გელის გამოყენება არ შეიძლება.

ძუძუთი კვება

ნაკლებად სავარაუდოა, რომ ეს პრეპარატი დედის რძეში გადავიდეს. ძუძუთი კვების დროს ოქტიზი გელის გამოყენება სარძევე ჯირკვლის არეში არ შეიძლება.

სატრანსპორტო საშუალებების მართვა და მექანიზმებთან მუშაობა

ოქტიზი გელს არ აქვს ან აქვს უმნიშვნელო გავლენა სატრანსპორტო საშუალებების  მართვასა და მექანიზმებთან მუშაობის უნარზე.

ოქტიზი გელი შეიცავს სპირტს (ეთანოლს) და ბუტილჰიდროქსიტოლუოლს

ეს წამალი შეიცავს 95.2 მგ სპირტს (ეთანოლს) ყოველ 1 გ-ში.

მან შეიძლება გამოიწვიოს წვის შეგრძნება დაზიანებულ კანზე.

ბუტილჰიდროქსიტოლუენმა შეიძლება გამოიწვიოს ადგილობრივი კანის რეაქციები (მაგ. კონტაქტური დერმატიტი) ან თვალებისა და ლორწოვანი გარსების გაღიზიანება.

3.როგორ გამოვიყენოთ ოქტიზი გელი

ყოველთვის გამოიყენეთ ეს წამალი ზუსტად ისე, როგორც აღწერილია ამ ინსტრუქციაში ან ექიმის ან ფარმაცევტის მითითებების შესაბამისად. თუ არ ხართ დარწმუნებული, მიმართეთ ექიმს ან ფარმაცევტს.

ეს სამკურნალო საშუალება უნდა იქნას გამოყენებული კანზე (ის განკუთვნილია მხოლოდ კანისთვის). წაისვით ოქტიზი გელი თხელი ფენით კანის დასამუშავებელ უბანზე, სანამ ის მთლიანად არ დაიფარება.

დაელოდეთ მინიმუმ 1 ან 2 წუთი ნებისმიერი შემდგომი ზომების მიღებამდე, როგორიცაა ჭრილობის სახვევის დადება. ეს დრო საჭიროა იმისათვის, რომ პროდუქტმა მოგვცეს სასურველი ეფექტი.

იმისათვის, რომ ეს პრეპარატი იყოს ეფექტური, თქვენ ყურადღებით უნდა დაიცვათ ეს ინსტრუქციები.

ოქტიზი გელი უნდა იქნას გამოყენებული დღეში მაქსიმუმ სამჯერ.

ნუ გამოიყენებთ ამ პრეპარატს 2 კვირაზე მეტი ხანგრძლივობით ექიმთან კონსულტაციის გარეშე.

გამოყენება ბავშვებსა და მოზარდებში

ადგილობრივი გამოყენების გამო, ოქტიზი გელი გამოიყენება ერთნაირად მოზრდილებში, ბავშვებსა და მოზარდებში. 6 წლამდე ასაკის ბავშვებში ოქტიზი გელი უნდა იქნას გამოყენებული მხოლოდ რამდენიმე დღის განმავლობაში.

თუ იყენებთ ოქტიზი გელის საჭიროზე მეტ დოზას

ადგილობრივი გამოყენების პრეპარატის შემთხვევაში, დოზის გადაჭარბება ნაკლებად სავარაუდოა. თუმცა, თუ ნერვიულობთ, რჩევისთვის მიმართეთ ექიმს ან ფარმაცევტს.

თუ შემთხვევით გადაყლაპავთ ოქტიზი გელს, დაუყოვნებლივ უნდა მიმართოთ ექიმს რჩევისთვის.

ამ პრეპარატის გამოყენებასთან დაკავშირებით დამატებითი კითხვების შემთხვევაში, მიმართეთ ექიმს ან ფარმაცევტს.

4.შესაძლო გვერდითი ეფექტები

ყველა პრეპარატის მსგავსად, ამ პრეპარატმაც შეიძლება გამოიწვიოს გვერდითი ეფექტები, თუმცა ყველას არ უვითარდება.

იშვიათი (შეიძლება აღენიშნებოდეს 1000-დან 1 ადამიანს):

იშვიათ შემთხვევებში, შეყვანის ადგილას შეიძლება განვითარდეს წვა, სიწითლე, ქავილი და სითბოს შეგრძნება.

ძალიან იშვიათი (შეიძლება აღენიშნებოდეს 10000-დან 1 პაციენტს):

შესაძლებელია ადგილობრივი კანის გაღიზიანება (კონტაქტური ალერგიული რეაქციები), როგორიცაა დამუშავებული კანის დროებით გაწითლება. თუ ოქტიზი გელი პირის ღრუში მოხვდება, ის დროებით იწვევს მწარე გემოს.

დამატებითი გვერდითი მოვლენები ბავშვებსა და მოზარდებში

ნაადრევადშობილებში ამ პრეპარატის გამოყენებამ შეიძლება გამოიწვიოს კანის დროებითი გამონაყარი (ერითემატოზული რეაქცია).

გვერდითი ეფექტების სიხშირე, ტიპი და სიმძიმე ბავშვებსა და მოზარდებში მოსალოდნელია, რომ იყოს იგივე, რაც მოზრდილებში.

შეტყობინება გვერდითი ეფექტების შესახებ

ნებისმიერი გვერდითი ეფექტის გამოვლენის შემთხვევაში, მიმართეთ ექიმს ან ფარმაცევტს. ეს ეხება ნებისმიერ შესაძლო გვერდით ეფექტს, რომელიც არ არის ჩამოთვლილი ამ ფურცელ-ჩანართში. 

გვერდითი ეფექტების შეტყობინებით თქვენ ხელს შეუწყობთ ამ პრეპარატის უსაფრთხოების შესახებ მეტი ინფორმაციის მოპოვებას.

5.როგორ შევინახოთ ოქტიზი გელი

შეინახეთ ეს პრეპარატი ბავშვებისთვის მიუწვდომელ ადგილას.

არ გამოიყენოთ ეს პრეპარატი ვარგისობის ვადის გასვლის შემდეგ, რომელიც მითითებულია ტუბსა და კოლოფზე „ვარგისიანობის ვადა“-ს გასწვრივ.

ვარგისობის ვადა მოიცავს მითითებული თვის ბოლო დღეს.

ეს პრეპარატი არ საჭიროებს შენახვის განსაკუთრებულ პირობებს.

პირველი გახსნის შემდეგ: შეინახეთ არაუმეტეს 25°C ტემპერატურის პირობებში. ვარგისობის ვადა პირველი გახსნის შემდეგ: 1 წელი.

ნუ გადაგდებთ ნებისმიერ წამალს ჩამდინარე წყლებში ან საყოფაცხოვრებო ნარჩენებში. ჰკითხეთ ფარმაცევტს, თუ როგორ გადაყაროთ გამოუყენებელი წამლები. ეს ზომები ხელს შეუწყობს გარემოს დაცვას.

6.შეფუთვის შემცველობა და სხვა ინფორმაცია

რას შეიცავს ოქტიზი გელი

- აქტიური ნივთიერებებია ოქტენიდინის დიჰიდროქლორიდი და ფენოქსიეთანოლი. 1 გ გელი შეიცავს 1 მგ ოქტენიდინის დიჰიდროქლორიდს და 10 მგ ფენოქსიეთანოლს. - სხვა ინგრედიენტებია: ეთანოლი 96%, გლიცეროლი 85%, პოლოქსამერი 407 (შეიცავს ბუტილჰიდროქსიტოლუოლს (E321)) და გასუფთავებული წყალი.

როგორ გამოიყურება ოქტიზი გელი და შეფუთვის შიგთავსი

ოქტიზი გელი არის სუფთა, გამჭვირვალე და ერთგვაროვანი გელი, რომელიც დაბალ ტემპერატურაზე (15 °C-ზე ქვემოთ) ხდება ძალიან თხევადი, ხოლო მაღალ ტემპერატურაზე - უფრო ბლანტი.

ის ხელმისაწვდომია HD- და LD-პოლიეთილენისგან დამზადებულ გამჭვირვალე ტუბებში, პოლიპროპილენისგან დამზადებული გამჭვირვალე ხრახნიანი თავსახურებით.

შეფუთვის ზომაა 30 გ. 

სავაჭრო ლიცენზიის მფლობელი:

EGIS Pharmaceuticals PLC

1106 ბუდაპეშტი, კერესტურის ქ. 30-38.

უნგრეთი