მაგნონორმი ჯენერიკონი - Magnonorm Genericon 365მგ 30 ხსნადი ტაბლეტი

მაგნონორმი გენერიკონი 365 მგ ხსნადი ტაბლეტები

აქტიური ნივთიერებები: მაგნიუმის ოქსიდი და მაგნიუმის კარბონატი

პრეპარატის გამოყენებამდე ყურადღებით გაეცანით ფურცელ-ჩანართს, რადგან მასში მოცემულია თქვენთვის მნიშვნელოვანი ინფორმაცია.

- შეინახეთ ფურცელი ჩანართი, შესაძლოა კვლავ დაგჭირდეთ.

- დამატებითი შეკითხვების შემთხვევაში მიმართეთ ექიმს ან ფარმაცევტს.

- პრეპარატი დაგენიშნათ ინდივიდუალურად თქვენ. არ გადასცეთ სხვებს, რადგან მიუხედავად დაავადების მსგავსი ნიშნებისა, შესაძლოა ავნოს მათ.

- ნებისმიერი გვერდითი ეფექტის გამოვლენის შემთხვევაში მიმართეთ ექიმს ან ფარმაცევტს. ეს ეხება ნებისმიერ შესაძლო გვერდით ეფექტსაც, რომელიც არ არის მოცემული აღნიშნულ ფურცელ-ჩანართში. იხ. ნაწილი 4.

ფურცელ-ჩანართში შედის

1. რა არის მაგნონორმი გენერიკონი და რისთვის გამოიყენება

2. რა უნდა იცოდეთ მაგნონორმი გენერიკონის მიღებამდე

3. მაგნონორმი გენერიკონის მიღების წესი

4. შესაძლო გვერდითი ეფექტები

5. მაგნონორმი გენერიკონის შენახვის პირობები

6. რა შედის შეფუთვაში და სხვა ინფორმაცია

1. რა არის მაგნონორმი გენერიკონი და რისთვის გამოიყენება

მაგნონორმი გენერიკონი აქტიური ნივთიერები სახით შეიცავს მაგნიუმს, მაგნიუმის ოქსიდის და მაგნიუმის კარბონატის ფორმით.

მაგნონორმი გენერიკონი გამოიყენება მაგნიუმის დეფიციტის ყველა ფორმის და მასთან დაკავშირებული სიმპტომების დროს, რომლებიც არ საჭიროებენ ინექციურ მკურნალობას.

2. რა უნდა იცოდეთ მაგნონორმი გენერიკონის მიღებამდე

არ მიიღოთ მაგნონორმი გენერიკონი

- თუ გაქვთ ალერგია მაგნიუმის ოქსიდის, მაგნიუმის კარბონატის ან პრეპარატის რომელიმე სხვა ინგრედიენტის მიმართ (ჩამოთვლილია ნაწილში 6).

- თუ გაქვთ თირკმლის ფუნქციის მწვავე დარღვევები

- თუ აღინიშნება ორგანიზმიდან სითხის ძლიერი დაკარგვა (დეჰიდრატაცია).

- თუ გაქვთ მიდრეკილება საშარდე გზებში გარკვეული სახის კენჭების წარმოქმნის მიმართ (კალციუმის, მაგნიუმის, ამონიუმის ფოსფატის კენჭები).

გაფრთხილებები და სიფრთხილის ზომები

მაგნონორმი გენერიკონის მიღებამდე გაესაუბრეთ ექიმს ან ფარმაცევტს, თუ გაწუხებთ თირკმლის ფუნქციის მსუბუქი ან ზომიერი დარღვევები. ამ შემთხვევაში განსაკუთრებული სიფრთხილეა საჭირო მაგნონორმი გენერიკონის მიღებამდე, რადგან შეიძლება გამოიწვიოს ორგანიზმში მაგნიუმის დაგროვება. ექიმმა შეიძლება რეგულარულად შეამოწმოს სისხლში მაგნიუმის დონე.

ბავშვები და მოზარდები 14 წლამდე

მაგნიუმის მაღალი შემცველობის გამო მაგნონორმი გენერიკონი არ არის მისაღები ბავშვებისა და 14 წლამდე ასაკის მოზარდებისთვის.

სხვა პრეპარატები და მაგნონორმი გენერიკონი

აცნობეთ ექიმს ან ფარმაცევტს თუ ღებულობთ/იყენებთ, ბოლო პერიოდში იღებდით/იყენებდით ან შესაძლოა მიიღოთ/გამოიყენოთ ნებისმიერი სხვა პრეპარატი.

დაცული უნდა იყოს 3-4 საათიანი ინტერვალი მაგნონორმი გენერიკონის და რკინის შემცველი პრეპარატების, ტეტრაციკლინების, ნატრიუმის ფტორიდის, ქლორპრომაზინის ან დიგოქსინის მიღებას შორის.

ორსულობა და ძუძუთი კვება

პრეპარატის მიღებამდე რჩევისთვის მიმართეთ ექიმს ან ფარმაცევტს თუ ორსულად ხართ ან ძუძუთი კვებავთ ბავშვს, ეჭვობთ ორსულობაზე ან გეგმავთ ორსულობას.

მაგნონორმი გენერიკონის მიღება შესაძლებელია ორსულობისა და ძუძუთი კვების პერიოდში ექიმის დანიშნულებით.

ტრანსპორტის მართვა და მექანიზმების გამოყენება

მაგნონორმი გენერიკონი არ ახდენს გავლენას ან უმნიშვნელოდ მოქმედებს ტრანსპორტის მართვისა და მექანიზმებთან მუშაობის უნარზე.

მაგნონორმი გენერიკონი შეიცავს კალიუმს, ნატრიუმს და სორბიტოლს.

აღნიშნული პრეპარატი შეიცავს 2.5 მმოლ (ან 97.6 მგ) კალიუმს თითო დოზაზე. გასათვალისწინებელია თირკმლის დაქვეითებული ფუნქციის მქონე პაციენტებში ან კალიუმის კონტროლირებად დიეტაზე მყოფ პაციენტებში.

აღნიშნული პრეპარატის თითო ხსნადი ტაბლეტი შეიცავს 107,2 მგ ნატრიუმს (საკვები/სუფრის მარილის ძირითადი კომპონენტი), რაც ექვივალენტურია ზრდასრულთათვის ნატრიუმის რეკომენდებული მაქსიმალური დღიური კვებითი მოხმარების 5%-სა.

აღნიშნული პრეპარატის თითო ხსნადი ტაბლეტი შეიცავს 0.7 მგ სორბიტოლს.

მაგნონორმი გენერიკონი არ შეიცავს შაქარს და შესაბამისად მისაღებია დიაბეტით დაავადებულთათვის.

3. მაგნონორმი გენერიკონის მიღების წესი

ყოველთვის მიიღეთ პრეპარატი ზუსტად ექიმის დანიშნულების მიხედვით. თუ არ ხართ დარწმუნებული, მიმართეთ ექიმს ან ფარმაცევტს.

მიიღება გახსნის შემდეგ.

ხსნადი ტაბლეტი მთლიანად გახსენით ჭიქა წყალში და მაშინვე დალიეთ. კვებამდე მიღება აუმჯობესებს ორგანიზმში შეწოვას.

მკაცრად უნდა დაიცვათ ექიმის მიერ დანიშნული დოზა.

თუ სხვაგვარად არ არის დანიშნული, გამოიყენება შემდეგი დოზირება:

მოზრდილები და 14 წელზე უფროსი ასაკის მოზარდები: 1 ხსნადი ტაბლეტი დღეში ერთხელ

ექიმი განსაზღვრავს მკურნალობის ხანგრძლივობას.

თირკმლის ფუნქციის დარღვევის მქონე პაციენტები

დოზის ფრთხილად შერჩევაა საჭირო თირკმლის ფუნქციის მსუბუქი და ზომიერი დარღვევების მქონე პაციენტებში  (იხ. „გაფრთხილებები და სიფრთხილის ზომები“). მაგნონორმი გენერიკონი არ მიიღება თირკმლის ფუნქციის მწვავე დარღვევების (კრეატინინის კლირენსი <30 მლ/წთ) მქონე პაციენტებში  (იხ. ნაწილი „არ მიიღოთ მაგნონორმი გენერიკონი“).

თუ მიიღეთ საჭიროზე მეტი მაგნონორმი გენერიკონი  

დოზის გადაჭარბების შემთხვევაში მოსალოდნელია ჩივილები კუჭ-ნაწლავის ტრაქტის მხრივ (დიარეა) და შესაძლოა დაღლილობის მწვავე სიმპტომები. კონსულტაციისთვის მიმართეთ თქვენს ექიმს ან სასწრაფო დახმარების განყოფილებას.

თუ დაგავიწყდათ მაგნონორმი გენერიკონის მიღება

არ მიიღოთ ორმაგი დოზა გამოტოვებული დოზის ასანაზღაურებლად.

მიმართეთ ექიმს ან ფარმაცევტს თუ გაქვთ დამატებითი შეკითხვები პრეპარატის გამოყენების შესახებ.

4. შესაძლო გვერდითი ეფექტები

ყველა პრეპარატის მსგავსად აღნიშნულმა პრეპარატმაც შესაძლოა გამოიწვიოს გვერდითი ეფექტები, თუმცა არა ყველა პაციენტში.

ნაკლებად ხშირი (100-დან 1 პაციენტში):

- განავლის დარბილება ან თუნდაც დიარეა (შეიძლება გამოსწორდეს დღიური დოზის შემცირებით ან დროებით შეწყვეტით).

იშვიათი (1,000-დან 1 პაციენტში):

- დაღლილობის სიმპტომები მაღალი დოზების და ხანგრძლივად გამოყენებისას. ეს შეიძლება მიუთითებდეს, რომ სისხლში უკვე მიღწეულია მაგნიუმის მომატებული კონცენტრაცია.

გვერდითი ეფექტების შესახებ ინფორმაციის დაფიქსირება

რომელიმე გვერდითი ეფექტის გამოვლენის შემთხვევაში მიმართეთ ექიმს ან ფარმაცევტს. ეს ეხება ნებისმიერ შესაძლო გვერდით ეფექტსაც, რომელიც არ არის მოცემული აღნიშნულ ფურცელ-ჩანართში. 

გვერდითი ეფექტების შესახებ ინფორმაციის დაფიქსირებით შეგიძლიათ ხელი შეუწყოთ აღნიშნული პრეპარატის უსაფრთხოების შესახებ მეტი ინფორმაციის მოწოდებას.

5. მაგნონორმი გენერიკონის შენახვის პირობები

შეინახეთ ტუბი მჭიდროდ დახურულ მდგომარეობაში, რომ დაიცვათ შიგთავსი ტენისგან.

თავსახური შეიცავს დესიკანტი სილიციუმის გელს, რომელიც იცავს ხსნად ტაბლეტებს ჰაერის ტენიანობისგან. დესიკანტის შემთხვევით მიღება, თუნდაც მცირეწლოვანი ბავშვების მიერ, უსაფრთხოა და არ საჭიროებს ზომების მიღებას.

შეინახეთ ბავშვებისთვის მიუწვდომელ ადგილას.

არ მიიღოთ პრეპარატი მუყაოს ფოლოფზე და ტუბის ძირზე მითითებული ვარგისიანობის ვადის გასვლის შემდეგ. ვარგისიანობის ვადაში იგულისხმება მოცემული თვის ბოლო დღე.

არ გადაყაროთ პრეპარატები კანალიზაციაში ან საყოფაცხოვრებო ნაგავში. ჰკითხეთ ფარმაცევტს, როგორ გადაყაროთ პრეპარატები, რომლებსაც აღარ იყენებთ. ეს ზომები ხელს შეუწყობს გარემოს დაცვას.

6. რა შედის შეფუთვაში და სხვა ინფორმაცია

რას შეიცავს მაგნონორმი გენერიკონი:

- აქტიური ნივთიერებები:

342 მგ მაგნიუმის ოქსიდი და 670 მგ მაგნიუმის კარბონატი (შეესაბამება 365 მგ = 15 მმოლ მაგნიუმს)

მაგნიუმის ციტრატი არის წყალხსნარში.

- სხვა ინგრედიენტები:

ლიმონმჟავა, ნატრიუმის ჰიდროკარბონატი, უწყლო ნატრიუმის კარბონატი, კალიუმის ჰიდროკარბონატი, ნატრიუმი საქარინი, ნატრიუმის ციკლამატი, ნატრიუმის ქლორიდი, ლაიმის და ლიმონის არომატი (შეიცავს სორბიტოლს).

როგორია მაგნონორმი გენერიკონი ვიზუალურად და რა შედის შეფუთვაში

პერორალური ხსნარის მოსამზადებელი ტაბლეტები.

თეთრი ტაბლეტები გლუვი ზედაპირით.

ხსნადი ტაბლეტები მოთავსებულია პლასტმასის ტუბებში,  20 და 2 x 15 ტაბლეტი.

შეფუთვის ყველა ზომა შესაძლოა არ იყოს ბაზარზე.