ლოპერამიდი - Loperamid 2მგ 20 კაფსულა

Loperamida Grindeks 2მგ მყარი კაფსულები

Loperamide hydrochloride

სამკურნალო საშუალების გამოყენებამდე ყურადღებით წაიკითხეთ ინსტრუქცია, რადგან იგი შეიცავს  თქვენთვის მნიშვნელოვან ინფორმაციას.

ყოველთვის გამოიყენეთ ეს პრეპარატი ზუსტად ისე როგორც აღწერილია ამ ინსტრუქციაში, ან ექიმის ან ფარმაცევტის რეკომენდაციის მიხედვით.

-    შეინახეთ ეს ინსტრუქცია. შესაძლოა მოგვიანებით დაგჭირდეთ მისი ხელახლა წაკითხვა.

-    დამატებითი ინფორმაციის ან რჩევის საჭიროების შემთხვევაში მიმართეთ ფარმაცევტს.

-    თუ თქვენ გამოგივლინდათ რაიმე გვერდითი რეაქცია, მიმართეთ თქვენს ექიმს ან ფარმაცევტს. ეს ასევე ეხება იმ შესაძლო გვერდით მოვლენებსაც, რომლებიც არ არის აღწერილი ამ ინსტრუქციაში. იხილეთ პუნქტი 4.

-    აუცილებლად მიმართეთ ექიმს, თუ თავს უკეთ არ გრძნობთ ან 2 დღის შემდეგ თავს უარესად გრძნობთ.

რა არის ამ ინსტრუქციაში

1.  რას წარმოადგენს  Loperamida Grindeks  და რისთვის  გამოიყენება იგი

2.  რა უნდა იცოდეთ Loperamida Grindeks  გამოყენებამდე

3.  როგორ გამოვიყენოთ Loperamida Grindeks 

4.  შესაძლო გვერდითი მოვლენები

5.  როგორ შევინახოთ Loperamida Grindeks 

6.  შეფუთვის შიგთავსი და სხვა ინფორმაცია

1. რას წარმოადგენს  Loperamida Grindeks  და რისთვის  გამოიყენება იგი

Loperamida Grindeks მყარი კაფსულები შეიცავს აქტიურ ნივთიერებას ლოპერამიდის ჰიდროქლორიდს.

ლოპერამიდის ჰიდროქლორიდი ამკვრივებს განავალს და ამცირებს ნაწლავების მოქმედების სიხშირეს და მოცულობას.

Loperamida Grindeks გამოიყენება დიარეის უეცარი ხანმოკლე (მწვავე) შეტევების სიმპტომური მკურნალობისთვის მოზრდილებსა და 12 წელზე უფროსი ასაკის მოზარდებში.

აუცილებლად მიმართეთ ექიმს, თუ თავს უკეთ არ გრძნობთ ან 2 დღის შემდეგ თავს უარესად გრძნობთ.

2. რა უნდა იცოდეთ Loperamida Grindeks  გამოყენებამდე

არ გამოიყენოთ Loperamida Grindeks

·  თუ გაქვთ ალერგია ლოპერამიდის ჰიდროქლორიდის ან ამ პრეპარატის ნებისმიერი სხვა კომპონენტის  მიმართ (მითითებულია პუნქტი 6-ში);

·  2 წლამდე ასაკის;

·  თუ განავალში სისხლი გაქვთ ან მაღალი სიცხე გაქვთ;

·  თუ გაქვთ მწვავე წყლულოვანი კოლიტი;

·  თუ გაწუხებთ ბაქტერიული წარმოშობის გარკვეული ნაწლავური ანთება (სალმონელა, შიგელა, კამპილობაქტერია);

·  თუ გაქვთ ფსევდომემბრანული (ანტიბიოტიკით გამოწვეული) ნაწლავის ანთება;

·  თუ გაქვთ ყაბზობა, მუცლის შებერილობა ან ნაწლავის გაუვალობა.

თუ არ ხართ დარწმუნებული, ზემოთ ჩამოთვლილიდან რომელიმე გეხებათ თუ არა თქვენ, მიმართეთ ექიმს ან ფარმაცევტს.

გაფრთხილებები და სიფრთხილის ზომები

Loperamida Grindeks-ის მყარი კაფსულების მიღებამდე მიმართეთ ექიმს ან ფარმაცევტს.

·  Loperamida Grindeks-ით მკურნალობა მხოლოდ სიმპტომურია, მაგრამ არ ხსნის გამომწვევ მიზეზს. შესაძლებლობის შემთხვევაში, ყოველთვის საჭიროა სიმპტომის გამომწვევი მიზეზის მკურნალობა.

·   დიარეას თან ახლავს სითხისა და მარილების დაკარგვა, ამიტომ განსაკუთრებული ყურადღება უნდა მიექცეს მათ შევსებას, განსაკუთრებით ბავშვებში, დასუსტებულ ან ხანდაზმულ პირებში. სითხის აღსადგენად დალიეთ ჩვეულებრივზე მეტი სითხე და ჰკითხეთ ექიმს ან ფარმაცევტს რეჰიდრატაციის თერაპიის შესახებ, რათა შეივსოს დაკარგული მარილები.

·  ინფექციური დიარეის დროს Loperamida Grindeks არ ცვლის ანტიბაქტერიულ მკურნალობას.

·  უეცარი, მწვავე დიარეის დროს Loperamida Grindeks-ის კაფსულები ჩვეულებრივ 48 საათში აქრობს სიმპტომებს. თუ შედეგი არ დადგა, შეწყვიტეთ პრეპარატის მიღება და მიმართეთ ექიმს.

·  არ მიიღოთ Loperamida Grindeks კაფსულები, თუ თქვენმა ექიმმა გირჩიათ, თავი აარიდოთ ნაწლავების მოქმედების შემაფერხებელ მკურნალობას. მაგალითად, ეს შეიძლება მოხდეს, თუ გაქვთ ყაბზობა ან შებერილობა.

·   შიდსით დაავადებულ პაციენტებში დიარეის მკურნალობისას შებერილობის ნიშნების გამოვლენის შემთხვევაში, საჭიროა Loperamida Grindeks მყარი კაფსულების მიღების შეწყვეტა და ექიმთან კონსულტაცია.

·  აცნობეთ ექიმს, თუ გაქვთ ღვიძლის პრობლემები, რადგან Loperamida Grindeks მყარი  კაფსულების მიღების დროს შესაძლოა საჭირო გახდეს უფრო მკაცრი სამედიცინო მეთვალყურეობა.

ეს წამალი გამოიყენეთ მხოლოდ მითითებული ჩვენებისთვის (იხილეთ ნაწილი 1) და არასდროს არ გადააჭარბოთ რეკომენდირებულ დოზას (იხილეთ ნაწილი 3). გულის მუშაობის სერიოზული დარღვევები (სიმპტომები მოიცავს გახშირებულ ან არარეგულარულ გულისცემას) დაფიქსირდა პაციენტებში, რომლებიც იღებდნენ ლოპერამიდის დიდ დოზებს, Loperamida Grindeks -ის აქტიურ ნივთიერებას.

სხვა პრეპარატები და Loperamida Grindeks-ის მყარი კაფსულები

აცნობეთ ექიმს ან ფარმაცევტს ყველა იმ პრეპარატების შესახებ, რომელსაც ბოლო დროს იყენებთ, იყენებდით ან შესაძლოა გამოიყენოთ.

კუჭ-ნაწლავის ტრაქტის ფუნქციის დამაჩქარებელმა მედიკამენტებმა შეიძლება შეამცირონ Loperamida Grindeks-ის ეფექტი.

დესმოპრესინის ეფექტი შეიძლება გაძლიერდეს Loperamida Grindeks-ის პერორალურ  დესმოპრესინთან (ცენტრალური უშაქრო დიაბეტის სამკურნალოდ გამოყენებული პრეპარატი) ერთად მიღებისას.

შემდეგ აქტიურ ნივთიერებებს შეუძლიათ სისხლში ლოპერამიდის ჰიდროქლორიდის დონის მომატება:

-    ქინიდინი (გამოიყენება გულის რიტმის პრობლემების სამკურნალოდ და პრევენციისთვის)

-    რიტონავირი და საქვინავირი (მედიკამენტი, რომელიც გამოიყენება იმუნოდეფიციტის სამკურნალოდ)

-    იტრაკონაზოლი, კეტოკონაზოლი (გამოიყენება კანის სოკოვანი ინფექციების სამკურნალოდ)

-    გემფიბროზილი (გამოიყენება სისხლში ლიპიდების დონის შესამცირებლად);

-    კრაზანა (გამოიყენება განწყობის გასაუმჯობესებლად და მსუბუქი დეპრესიის სამკურნალოდ)

-    ვალერიანი (გამოიყენება ნევროზის და შფოთვის მსუბუქი მდგომარეობების სამკურნალოდ)

-    ოპიოიდური ანალგეტიკები (გამოიყენება ძალიან ძლიერი ტკივილის სამკურნალოდ), რადგან მან შეიძლება გაზარდოს ძლიერი ყაბზობის და ცენტრალური ნერვული სისტემის დათრგუნვის რისკი (მაგალითად, ძილიანობა ან ცნობიერების დაქვეითება).

ორსულობა, ძუძუთი კვება და ფერტილობა

პრეპარატის მიღების წინ გაიარეთ ექიმთან ან ფარმაცევტთან კონსულტაცია თუ ორსულად ხართ ან მეძუძური დედა ხართ,  შეიძლება იყოთ ორსულად ან გეგმავთ ორსულობას.

ორსულობა

ორსულობის დროს, განსაკუთრებით პირველ ტრიმესტრში, Loperamida Grindeks-ის გამოყენებას თავი უნდა აარიდოთ. ორსულობის დადასტურების ან ეჭვის შემთხვევაში, მიმართეთ ექიმს, რომელიც გადაწყვეტს, შეგიძლიათ თუ არა Loperamida Grindeks-ის მიღება.

ძუძუთი კვება

მცირე რაოდენობით შეიძლება მოხვდეს დედის რძეში. მიმართეთ ექიმს შესაბამისი მკურნალობის შესახებ.

მანქანისა და სხვა მექანიზმების მართვა

თუ Loperamida Grindeks -ის მყარი კაფსულების მიღების დროს (ან დიარეის გამო) გრძნობთ დაღლილობას, ძილიანობას ან თავბრუსხვევას, არ უნდა მართოთ მანქანა და არ გამოიყენოთ სხვა მექანიზმები.

Loperamida Grindeks შეიცავს ლაქტოზას  

Loperamida Grindeks-ის თითოეული კაფსულა შეიცავს 95 მგ ლაქტოზას. თუ ექიმმა გითხრათ, რომ გაქვთ ზოგიერთი შაქრის აუტანლობა, ამ სამკურნალო პროდუქტის მიღებამდე მიმართეთ ექიმს

3. როგორ გამოვიყენოთ Loperamida Grindeks

ყოველთვის გამოიყენეთ ეს პრეპარატი ზუსტად ისე როგორც აღწერილია ამ ინსტრუქციაში ან როგორც გითხრათ ექიმმა ან ფარმაცევტმა. თუ არ ხართ დარწმუნებული, მიმართეთ ექიმს ან ფარმაცევტს.

რეკომენდებული დოზა

მოზრდილები

საწყისი დოზაა 2 კაფსულა (4 მგ), შემდეგ 1 კაფსულა (2 მგ) ყოველი შემდგომი >ფაღარათის შემდეგ.

საერთო დღიური დოზა არ უნდა აღემატებოდეს 6 კაფსულას (12 მგ).

12 წელზე უფროსი ასაკის მოზარდები

საწყისი დოზაა 2 კაფსულა (4 მგ), შემდეგ 1 კაფსულა (2 მგ) ყოველი შემდგომი ფაღარათის შემდეგ.

საერთო დღიური დოზა არ უნდა აღემატებოდეს 4 კაფსულას (8 მგ).

12 წლამდე ასაკის ბავშვები

ლოპერამიდის შემცველი სხვა მედიკამენტები შეიძლება უფრო შესაფერისი იყოს 2-დან 12 წლამდე ასაკის ბავშვებისთვის.

2-12 წლის ბავშვებში გამოყენება არ შეიძლება ექიმის რეცეპტის გარეშე.

ლოპერამიდი არ უნდა მიეცეს 2 წლამდე ასაკის ბავშვებს.

ხანდაზმულები

ხანდაზმულებისთვის დოზის კორექცია საჭირო არ არის.

თირკმლის ფუნქციის დარღვევა

თირკმლის ფუნქციის დარღვევის მქონე პაციენტებისთვის დოზის კორექცია საჭირო არ არის.

ღვიძლის ფუნქციის დარღვევა

ლოპერამიდის ჰიდროქლორიდის შემცველი პრეპარატები სიფრთხილით უნდა იქნას გამოყენებული ღვიძლის ფუნქციის დარღვევის მქონე პაციენტებში. თუ თქვენ გაწუხებთ ღვიძლის უკმარისობა, Loperamida Grindeks-ის მყარი კაფსულების მიღებამდე მიმართეთ ექიმს.

მიღების წესი

კაფსულები უნდა გადაიყლაპოს მთლიანად, მცირე რაოდენობით სითხესთან ერთად. კაფსულები არ უნდა დაღეჭოთ მწარე გემოს გამო. კაფსულების მიღება შესაძლებელია დღის ნებისმიერ დროს, საკვებთან ერთად ან მის გარეშე.

მკურნალობის ხანგრძლივობა

თუ სიმპტომები 48 საათის განმავლობაში არ გაქრება, უნდა შეწყვიტოთ პრეპარატის მიღება და მიმართოთ ექიმს.

მკურნალობის მაქსიმალური ხანგრძლივობაა 48 საათი.

თუ გამოიყენეთ პრეპარატი Loperamida Grindeks, დანიშნულზე მეტი

თუ გამოიყენეთ პრეპარატი Loperamida Grindeks-ის ჭარბი დოზა დაუყონებლივ მიმართეთ ექიმს ან საავადმყოფოს რჩევისთვის. ასევე შეგიძლიათ დარეკოთ ტოქსიკოლოგიური ინფორმაციის სამსახურში, ტელეფონის ნომერზე 91 562 04 20 (მიუთითეთ მედიკამენტი და მიღებული რაოდენობა). სიმპტომები შეიძლება მოიცავდეს: გულისცემის გახშირებას, არარეგულარულ გულისცემის, გულისცემის ცვლილებებს (ამ სიმპტომებს შეიძლება ჰქონდეს პოტენციურად სერიოზული, სიცოცხლისთვის საშიში შედეგები), ნაწლავის გაუვალობა, გუგების შევიწროება (მიოზი), მგრძნობელობისა და სტიმულებზე რეაქციის დაქვეითებას (სტუპორი), კუნთების შებოჭილობას, მოძრაობების არაკოორდინირებულობას, ძილიანობას, პირის სიმშრალეს, მუცლის დისკომფორტს, გულისრევას, ღებინებას, ყაბზობას, შარდვის გაძნელებას და ქოშინს.

ბავშვები უფრო მძაფრად რეაგირებენ ლოპერამიდის ჰიდროქლორიდის დიდ რაოდენობაზე, ვიდრე მოზრდილები. თუ ბავშვმა მიიღო წამლის ჭარბი დოზა ან გამოავლინა ზემოთ ჩამოთვლილი სიმპტომებიდან რომელიმე, დაუყოვნებლივ მიმართეთ ექიმს.

თუ დაგავიწყდათ Loperamida Grindeks მიღება  

არ მიიღოთ ორმაგი დოზა გამოტოვებული კაფსულის სანაცვლოდ.

თუ თქვენ გაგიჩნდებათ დამატებითი კითხვები ამ პრეპარატის გამოყენებასთან დაკავშირებით, მიმართეთ ექიმს ან ფარმაცევტს.

4.   შესაძლო გვერდითი რეაქციები

ყველა პრეპარატის მსგავსად, ამ პრეპარატსაც შეუძლია გვერდითი მოვლენების გამოწვევა, თუმცა ისინი ყველას არ უვითარდება.

ლოპერამიდის ჰიდროქლორიდით მკურნალობა, როგორც წესი, კარგად აიტანება, თუმცა გვერდითი მოვლენები, როგორიცაა ყაბზობა და შებერილობა ან შარდვის გაძნელება, შეიძლება მაინც განვითარდეს ინსტრუქციების დაცვის შემთხვევაშიც კი.

ლოპერამიდის ჰიდროქლორიდის გამოყენებისას შეიძლება განვითარდეს ყაბზობა, მუცლის უფრო მძიმე შებერილობა და ნაწლავის გაუვალობა (ილეუსი). თუ ზემოთ ჩამოთვლილთაგან რომელიმეს შეამჩნევთ, დაუყოვნებლივ შეწყვიტეთ Loperamida Grindeks მყარი კაფსულების მიღება და მიმართეთ ექიმს

შეიძლება გამოვლინდეს ტკივილი მუცლის ზედა ნაწილში, მუცლის ტკივილი, რომელიც გადადის ზურგში, მტკივნეულობა მუცელზე შეხებისას, ცხელება, გახშირებული პულსი, გულისრევა, ღებინება, რაც შეიძლება იყოს პანკრეასის ანთების (მწვავე პანკრეატიტი) სიმპტომები. სიხშირე უცნობია (სიხშირის შეფასება შეუძლებელია არსებული მონაცემებით).

თუ რომელიმე მათგანი გამოგივლინდებათ, შეწყვიტეთ პრეპარატის მიღება და დაუყოვნებლივ მიმართეთ სამედიცინო დახმარებას.

ლოპერამიდის ჰიდროქლორიდის გამოყენებისას ასევე აღინიშნა სახის, ენისა და ყელის შეშუპებით გამოწვეული ჰიპერმგრძნობელობის რეაქციები (ანგიონევროზული შეშუპება), კანის უფრო მძიმე სიმპტომები და დაავადებები:

·  კანის მძიმე დაავადება გამონაყარით, კანის აქერცვლით და ლორწოვანი გარსის წყლულებით (სტივენს-ჯონსონის სინდრომი, ტოქსიკური ეპიდერმული ნეკროლიზი).

·  კანის მწვავე ანთებითი დაავადება, რომელსაც თან ახლავს პირის ღრუსა და ტუჩების ლორწოვანი გარსების ბუშტუკების გაჩენა (მულტიფორმული ერითემა).

თუ ზემოთ ჩამოთვლილთაგან რომელიმეს შეამჩნევთ, დაუყოვნებლივ შეწყვიტეთ Loperamida Grindeks -ის მიღება და მიმართეთ ექიმს.

კლინიკურ კვლევებში და პოსტმარკეტინგულ კვლევებში დაფიქსირებული გვერდითი რეაქციები

ხშირი გვერდითი მოვლენები (შეიძლება აღენიშნებოდეს 10-დან 1 პაციენტს)

- თავის ტკივილი, თავბრუსხვევა

- ყაბზობა, გულისრევა, მეტეორიზმის მომატება.

არახშირი გვერდითი მოვლენები (შეიძლება აღენიშნებოდეს 100-დან 1 პაციენტს)

- ძილიანობა

- მუცლის ტკივილი, მუცლის დისკომფორტი, პირის სიმშრალე, ღებინება, საჭმლის მონელების დარღვევა

- გამონაყარი.

იშვიათი გვერდითი რეაქციები (შეიძლება აღენიშნებოდეს 1000 პაციენტიდან 1-ს)

- ჰიპერმგრძნობელობის რეაქცია, ანაფილაქსიური რეაქცია (ანაფილაქსიური შოკის ჩათვლით), ანაფილაქტოიდური რეაქცია, ანგიონევროზული შეშუპება

- გონების დაკარგვა, მგრძნობელობისა და სტიმულებზე რეაქციის შემცირება (სტუპორი), ცნობიერების დონის შემცირება, კუნთების ტონუსის მომატება, კოორდინაციის სირთულეები

- გუგების შევიწროება

- მუცლის შებერილობა

- ნაწლავის გაუვალობა

 (ილეუსი), მსხვილი ნაწლავის დაავადება (მეგაკოლონი, მათ შორის ტოქსიკური მეგაკოლონი)

- ენის ტკივილი

- ჭინჭრის ციება, ქავილი

- შარდვის გაძნელება

- დაღლილობა.

Loperamida Grindeks-ით მკურნალობის დროს შეიძლება გამოვლინდეს რამდენიმე სიმპტომი, რომელთა გარჩევა, როგორც წესი, ძნელია დიარეასთან დაკავშირებული სიმპტომებისგან, როგორიცაა გულისრევა, მუცლის ტკივილი, ღებინება, დაღლილობა, თავბრუსხვევა, ძილიანობა, პირის სიმშრალე, მეტეორიზმი, მადის დაკარგვა.

შეტყობინებები გვერდითი ეფექტების შესახებ

თუ შეამჩნევთ რაიმე გვერდით მოვლენას, მიმართეთ ექიმს ან ფარმაცევტს. ეს მოიცავს ნებისმიერ შესაძლო გვერდით მოვლენას, რომელიც არ არის ჩამოთვლილი ამ ინსტრუქციაში.  გვერდითი მოვლენების შეტყობინებით თქვენ ხელს შეუწყობთ ამ მედიკამენტის უსაფრთხოების შესახებ მეტი ინფორმაციის მოპოვებას.

5.   როგორ უნდა შეინახოთ Loperamida Grindeks

შეინახეთ ეს წამალი ბავშვებისთვის უხილავ  და მიუწვდომელ ადგილას.

არ გამოიყენოთ პრეპარატი ვარგისობის ვადის გასვლის შემდეგ, რომელიც მითითებულია მუყაოს ყუთზე და ბლისტერზე წარწერის „EXP“ შემდეგ. ვარგისობის ვადის   თარიღად ითვლება მითითებული თვის ბოლო დღე.

ეს პროდუქტი არ საჭიროებს შენახვის განსაკუთრებულ პირობებს.

მედიკამენტი არ გადაყაროთ კანალიზაციაში და საყოფაცხოვრებო ნარჩენებთან ერთად. გამოუყენებელი მედიკამენტები და კონტეინერები გადააგდეთ აფთიაქის SIGRE შეგროვების პუნქტში ან სხვა სამედიცინო ნარჩენების შეგროვების სისტემაში. ეჭვის შემთხვევაში, ჰკითხეთ თქვენს ფარმაცევტს, თუ როგორ უნდა გადააგდოთ არასაჭირო კონტეინერები და მედიკამენტები. ეს ზომები ხელს შეუწყობს გარემოს დაცვას.

6.   შეფუთვის შიგთავსი და სხვა ინფორმაცია

რას შეიცავს  Loperamida Grindeks

- აქტიური ნივთიერება - ლოპერამიდის ჰიდროქლორიდი. თითოეული მყარი კაფსულა შეიცავს  2 მგ ლოპერამიდის ჰიდროქლორიდს.

- სხვა ინგრედიენტებია: ლაქტოზის მონოჰიდრატი, სიმინდის სახამებელი, მაგნიუმის სტეარატი (E572).

კაფსულის გარსი: ჟელატინი (E441), ტიტანის დიოქსიდი (E171), რკინის წითელი ოქსიდი (E172), რკინის ყვითელი ოქსიდი (E172), ბრილიანტის ლურჯი FCF (E133).

Loperamida Grindeks მყარი კაფსულა, როგორ გამოიყურება და შეფუთვის შიგთავსი

მყარი ჟელატინის კაფსულები No. 3 (დაახლოებით 16 მმ × 6 მმ) ვარდისფერი კორპუსით და მუქი მწვანე თავსახურით, შიგთავსი - თეთრი ფხვნილი. შეფუთვის ზომები: 6, 8, 10, 12, 18 ან 20 კაფსულა PVC/ალუმინის ბლისტერებში, შეფუთულია მუყაოს კოლოფში.

შესაძლოა, ყველა შეფუთვის ზომა არ იყოს ბაზარზე.

ასევე, იხილეთ: >ლოპერამიდი - Loperamide 2მგ 10 კაფსულა