კალირა - Calira 10მგ 28 ტაბლეტი

კალირა 10 მგ აპკიანი გარსით დაფარული ტაბლეტები 

მიიღება პერორალურად.

· აქტიური ნივთიერება: თითოეული აპკიანი გარსით დაფარული ტაბლეტი შეიცავს 10 მგ დაპაგლიფლოზინს.

· დამხმარე ნივთიერება(ები): მიკროკრისტალური ცელულოზა, PH 112,  უწყლო ლაქტოზა (მსხვილფეხა რქოსანი პირუტყვისგან მიღებული ლაქტოზა), კროსპოვიდონი CL, სილიციუმის კოლოიდური დიოქსიდი, მაგნიუმის სტეარატი, პოლივინილის სპირტი, პოლიეთილენგლიკოლი, სახამებელი, ტიტანის დიოქსიდი (E171),  რკინის წითელი  ოქსიდი (E172)

ამ მედიკამენტის მიღების დაწყებამდე ყურადღებით წაიკითხეთ მთელი ინსტრუქცია, რადგან ის შეიცავს თქვენთვის მნიშვნელოვან ინფორმაციას.

რა არის მოცემული ამ ინსტრუქციაში:

1. რა არის კალირა და რისთვის გამოიყენება?

2. კალირას გამოყენებამდე გასათვალისწინებელი

3. როგორ გამოიყენება კალირა?

4. რა არის შესაძლო გვერდითი ეფექტები?

5. კალირას შენახვის წესი

1.რა არის კალირა და რისთვის გამოიყენება

· კალირა არის ყვითელი, მოგრძო ფორმის, აპკიანი გარსით დაფარული ტაბლეტები. კალირა წარმოდგენილია  Al/Al ბლისტერებზე მოთავსებული 28 ან 90 ტაბლეტის სახლით, მუყაოს კოლოფში, გამოყენების ინსტრუქციასთან ერთად.

· კალირა შეიცავს 10 მგ დაპაგლიფლოზინს, მოქმედი ნივთიერების სახით. დაპაგლიფლოზინი მიეკუთვნება ნატრიუმ-გლუკოზის კოტრანსპორტერი 2-ის  ინჰიბიტორების  სახელით ცნობილი სამკურნალო პრეპარატების ჯგუფს. ეს პრეპარატები თრგუნავენ SGLT2 ცილას თქვენს თირკმელში. ამ ცილის დათრგუნვით, თქვენი ორგანიზმიდან შარდის საშუალებით გამოიდევნება შაქარი (გლუკოზა), მარილი (ნატრიუმი) და წყალი.

კალირა გამოიყენება მოზრდილებში (18 წლის და უფროსი ასაკის) შემდეგი დარღვევების სამკურნალოდ:

 • ტიპი 2 შაქრიანი დიაბეტი  

− დიეტითა და ვარჯიშით არასაკმარისად კონტროლირებული ტიპი 2 შაქრიანი დიაბეტის დროს, კალირა შეიძლება გამოყენებულ იქნას როგორც მონოთერაპიის სახით, ასევე დიაბეტის სამკურნალო სხვა პრეპარატებთან ერთად.

− მნიშვნელოვანია, რომ განაგრძოთ თქვენი ექიმის, ფარმაცევტის ან ექთნის მიერ რეკომენდებული დიეტა და ვარჯიში.

რა არის ტიპი 2 შაქრიანი დიაბეტი და როგორ ეხმარება კალირა ტიპი 2 შაქრიანი დიაბეტის მკურნალობაში?

· ტიპი 2 დიაბეტის დროს თქვენი ორგანიზმი ვერ გამოიმუშავებს საკმარისი რაოდენობის ინსულინს ან ვერ მოიხმარს მას სათანადოდ. ეს იწვევს სისხლში შაქრის (გლუკოზის) დონის მატებას. შაქრის დონის მატება ხელს უწყობს ისეთი სერიოზული მდგომარეობების განვითარებას, როგორიცაა გულის ან თირკმლის დაავადება, მხედველობის დაკარგვა და სისხლის მიმოქცევის მოშლა ზედა და ქვედა კიდურებში.

კალირას საშუალებით ხდება ორგანიზმიდან ჭარბი გლუკოზის გამოდევნა, ასევე ხელს უშლის გულის დაავადების განვითარებას.

2. კალირას გამოყენებამდე გასათვალისწინებელი

არ გამოიყენოთ კალირა შემდეგ სიტუაციებში

· თუ ხართ ალერგიული დაპაგლიფლოზინის ან კალირას შემადგენლობაში შემავალი ნებისმიერი სხვა ნივთიერების მიმართ.

სიფრთხილით გამოიყენეთ კალირა შემდეგ სიტუაციებში

დაუყოვნებლივ მიმართეთ ექიმს ან უახლოეს საავადმყოფოს შემდეგ შემთხვევებში:

დიაბეტური კეტოაციდოზი

• თუ გაქვთ დიაბეტი და გაქვთ გულისრევა ან ღებინება, მუცლის ტკივილი, ძლიერი წყურვილის შეგრძნება, სწრაფი და ღრმა სუნთქვა, დაბნეულობა (თავბრუსხვევის შეგრძნება), უჩვეულო ძილიანობა ან დაღლილობა, ტკბილი სუნი ამონასუნთქ ჰაერში, ტკბილი ან მეტალის გემო პირში, თუ გრძნობთ განსხვავებულ სუნს შარდში ან ოფლში, სწრაფი წონის კლება,

• ზემოაღნიშნული სიმპტომები შეიძლება იყოს "დიაბეტური კეტოაციდოზის" - სერიოზული, ზოგჯერ სიცოცხლისთვის საშიში დარღვევის ნიშანი, რომელიც შეიძლება განვითარდეს დიაბეტის დროს შარდში ან სისხლში "კეტონური სხეულების" დონის ზრდის გამო.

• დიაბეტური კეტოაციდოზის რისკი შეიძლება გაიზარდოს ისეთ პირობებში, როგორიცაა ხანგრძლივი შიმშილი, ალკოჰოლის ჭარბები მოხმარება, დეჰიდრატაცია (სითხის დაკარგვა), ინსულინის დოზის უეცარი შემცირება ან მეტი ინსულინის საჭიროება მნიშვნელოვანი ქირურგიული ჩარევის  (დიდი ოპერაცია) ან მძიმე ავადმყოფობის გამო.

• კალირათი მკურნალობისას დიაბეტური კეტოაციდოზი შეიძლება განვითარდეს მაშინაც კი, თუ სისხლში შაქრის დონე ნორმალურია.

დიაბეტური კეტოაციდოზზე ეჭვის შემთხვევაში, დაუყოვნებლივ მიმართეთ ექიმს ან უახლოეს საავადმყოფოს და არ გამოიყენოთ ეს პრეპარატი.

ნეკროზული ფასციიტი:

· დაუყოვნებლივ მიმართეთ ექიმს, თუ გაგიჩნდებათ ტკივილის, მომატებული მგრძნობელობის, სიწითლის ან შეშუპების სიმპტომების ერთობლიობა სასქესო ორგანოებში ან სასქესო ორგანოებსა და ანუსს შორის, ცხელებით  ან ზოგადი უსიამოვნო შეგრძნებით. ეს სიმპტომები შეიძლება იყოს იშვიათი, მაგრამ სერიოზული და სიცოცხლისთვის საშიში ინფექციის ნიშანი, რომელსაც ეწოდება პერინეალური ნეკროზული ფასციიტი ან ფურნიეს განგრენა, რომელიც ანადგურებს კანქვეშა ქსოვილს. ფურნიეს განგრენას დროულად უნდა უმკურნალონ.

კალირას მიღებამდე გაესაუბრეთ თქვენს ექიმს, ფარმაცევტს ან ექთანს თუ:

· გაქვთ “ტიპი 1 დიაბეტი”. ეს არის დიაბეტის ტიპი, რომელიც ჩვეულებრივ იწყება ახალგაზრდა ასაკში და ორგანიზმი არ გამოიმუშავებს ინსულინს.

· გაქვთ დიაბეტი და თირკმლის პრობლემები - ექიმმა შეიძლება მოგთხოვოთ  დამატებითი ან სხვა მედიკამენტიs მიღება სისხლში შაქრის დონის გასაკონტროლებლად.

· გაქვთ ღვიძლის პრობლემები - ექიმმა შეიძლება გადაწყვიტოს მკურნალობის დაწყება უფრო დაბალი დოზით.

· იღებთ პრეპარატებს, რომლებიც ამცირებენ თქვენს წნევას (ანტიჰიპერტენზიული საშუალებები) და გაქვთ დაბალი არტერიული წნევის ანამნეზი (ჰიპოტენზია). დამატებითი ინფორმაცია მოცემულია ქვემოთ სათაურით „სხვა პრეპარატებთან ერთდროული გამოყენება“.

· სისხლში შაქრის ძალიან მაღალი დონე გაქვთ, რამაც შეიძლება გამოიწვიოს დეჰიდრატაცია (სითხის ჭარბი დაკარგვა). დეჰიდრატაციის შესაძლო ნიშნები მოცემულია პარაგრაფში 4. თუ თქვენ გაქვთ რომელიმე ჩამოთვლილი სიმპტომი, აცნობეთ ექიმს, სანამ დაიწყებთ კალირას მიღებას.

· გაქვთ გულისრევა, ღებინება ან ცხელება, არ შეგიძლიათ საკვების და სასმელის მიღება. თუ არ შეგიძლიათ დალევა, ამან შეიძლება გამოიწვიოს დეჰიდრატაცია. ექიმმა შეიძლება მოგთხოვოთ კალირას მიღების შეწყვეტა მდგომარეობის გაუმჯობესებამდე, ეჰიდრატაციის თავიდან აცილების მიზნით.

· საშარდე გზების ხშირი ინფექციები.

თუ ჩამოთვლილთაგან რომელიმე თქვენ გეხებათ (ან არ ხართ დარწმუნებული), გაესაუბრეთ თქვენს ექიმს, ფარმაცევტს ან ექთანს.

დიაბეტი და ტერფის მოვლა

თუ დიაბეტი გაქვთ, მნიშვნელოვანია ტერფების რეგულარული შემოწმება და ექიმის მიერ მოწოდებული ყველა რეკომენდაციის დაცვა.

გლუკოზა შარდში

კალირას მოქმედების მექანიზმიდან გამომდინარე, თქვენი შარდის შაქრის ტესტი დადებითი იქნება ამ მედიკამენტის მიღებისას.

თუ ეს გაფრთხილებები გეხებათ თქვენ, ან თუნდაც წარსულში გეხებოდათ,  გთხოვთ, მიმართოთ ექიმს.

კალირას გამოყენება საკვებთან და სასმელთან ერთად

კალირა მიიღება საკვებთან ერთად ან მის გარეშე.

ორსულობა

ამ მედიკამენტის გამოყენებამდე მიმართეთ თქვენს ექიმს ან ფარმაცევტს.

თუ ორსულად ხართ, გაქვთ ეჭვი ორსულობაზე ან გეგმავთ დაორსულებას, პრეპარატის მიღებამდე კონსულტაციისთვის მიმართეთ თქვენს ექიმს ან ფარმაცევტს. დაორსულების შემთხვევაში, უნდა შეწყვიტოთ პრეპარატის მიღება, ვინაიდან მისი გამოყენება არ არის რეკომენდებული ორსულობის მეორე და მესამე ტრიმესტრის დროს. გაესაუბრეთ თქვენს ექიმს ორსულობის დროს სისხლში შაქრის კონტროლის საუკეთესო მეთოდების შესახებ.

ფიქრობთ, რომ შეიძლება იყოთ ორსულად ან გეგმავთ ორსულობას, ამ მედიკამენტის

თუ მკურნალობის დროს მიხვდებით, რომ ორსულად ხართ, დაუყოვნებლივ მიმართეთ ექიმს ან ფარმაცევტს.

ძუძუთი კვება

ამ მედიკამენტის გამოყენებამდე მიმართეთ თქვენს ექიმს ან ფარმაცევტს.

თუ თქვენ აპირებთ ძუძუთი კვებას ან ხართ მეძუძური დედა, გაესაუბრეთ ექიმს, ამ მედიკამენტის მიღების დაწყებამბე. არ გამოიყენოთ კალირა თუ ხართ მეძუძური დედა. უცნობია გადადის თუ არა ეს მედიკამენტი დედის რძეში.

ავტომობილის და მექანიზმების გამოყენება

კალირას არ აქვს ან უმნიშვნელო ზეგავლენა აქვს მანქანის მართვისა და მექანიზმებთან მუშაობის უნარზე. ამ მედიკამენტის მიღებამ სხვა სამკურნალო საშუალებებთან- სულფონილშარდოვანას ან ინსულინთან ერთად, შეიძლება გამოიწვიოს სისხლში შაქრის ძალიან დაბალი დონე, რამაც შეიძლება გავლენა მოახდინოს ავტომობილის მართვისა და მექანიზმებთან მუშაობის უნარზე, გამოიწვიოს ისეთი სიმპტომები, როგორიცაა კანკალი, ოფლიანობა და მხედველობის ცვლილება. თუ კალირას მიღებისას თავბრუსხვევა გაქვთ, არ მართოთ ავტომობილი და არ გამოიყენოთ მექანიზმები.

მნიშვნელოვანი ინფორმაცია კალირას შემადგენლობაში შემავალი ზოგიერთი დამხმარე ნივთიერების შესახებ

კალირა შეიცავს ლაქტოზას (შაქრის სახეობას). თუ ექიმმა გითხრათ, რომ გაქვთ აუტანლობა ზოგიერთი შაქრის მიმართ, მიმართეთ თქვენს ექიმს მედიკამენტის მიღების დაწყებამდე.

სხვა პრეპარატებთან ერთდროული გამოყენება

აცნობეთ თქვენს ექიმს, ფარმაცევტს ან ექთანს თუ იღებთ, ცოტა ხნის წინ იღებდით ან შესაძლოა მიიღოთ სხვა მედიკამენტები.

მიმართეთ ექიმს, განსაკუთრებით შემდეგ შემთხვევებში:

· თუ იღებთ მედიკამენტს, რომელიც გამოიყენება ორგანიზმიდან სითხის გამოსაყოფად (დიურეზული საშუალება).

· თუ იყენებთ მედიკამენტებს, რომლებიც ამცირებენ არტერიულ წნევას (ანტიჰიპერტენზიული საშუალებები).

· თუ გაქვთ ტიპი 2 შაქრიანი დიაბეტი და იღებთ სხვა მედიკამენტებს, რომლებიც ამცირებენ სისხლში შაქრის დონეს, როგორიცაა ინსულინი ან სულფონილშარდოვანას პრეპარატი. შესაძლოა თქვენმა ექიმმა გადაწყვიტოს სხვა მედიკამენტების დოზის შემცირება, სისხლში შაქრის დონის მკვეთრი კლების (ჰიპოგლიკემიის) თავიდან აცილების მიზნით.

· კალირამ შეიძლება გამოიწვიოს სისხლში ლითიუმის დონის შემცირება.

თუ ამჟამად იყენებთ ან ცოტა ხნის წინ იყენებდით დ რეცეპტით ან ურეცეპტოდ გაცემულ რაიმე პრეპარატს, გთხოვთ მათ შესახებ აცნობოთ თქვენს ექიმს ან ფარმაცევტს.

3. როგორ გამოიყენება კალირა?

ყოველთვის მიიღეთ პრეპარატი ექიმის დანიშნულების შესაბამისად. თუ არ ხართ დარწმუნებული, გაესაუბრეთ თქვენს ექიმს, ფარმაცევტს ან ექთანს.

ინსტრუქცია დოზირების/მიღების სიხშირის შესახებ:

• რეკომენდებული დოზა შეადგენს ერთ 10 მგ ტაბლეტს ერთხელ დღეში.

• ექიმმა შეიძლება დაიწყოს მკურნალობა 5 მგ დოზით ღვიძლის პრობლემების არსებობის შემთხვევაში,

• თქვენი ექიმი დაგინიშნავთ თქვენთვის შესაფერის დოზას.

პრეპარატის მიღების წესი:

• ტაბლეტი გადაიყლაპეთ მთლიანად, საკმარისი რაოდენობა წყლის მიყოლებით.

• ტაბლეტის მიღება შეიძლება საკვებთან ერთად ან მის გარეშე.

• ტაბლეტის მიღება შეიძლება დღის ნებისმიერ მონაკვეთში, მაგრამ ეცადეთ მიიღოთ ერთსა და იმავე დროს. ეს დაგეხმარებათ არ გამოტოვოთ ტაბლეტის მიღება.

სისხლში შაქრის დონის შესამცირებლად, შესაძლოა ექიმმა კალირა დაგინიშნოთ სხვა სამკურნალო საშუალებებთან ერთად. არ დაგავიწყდეთ ყველა მედიკამენტის მიღება, ექიმის დანიშნულებიოს მიხედვით. ეს დაგეხმარებათ თქვენი ჯანმრთელობისთვის საუკეთესო შედეგის მიღწევაში.

დიეტა და ვარჯიში დაგეხმარებათ ორგანიზმი არსებული შაქრის უკეთ ათვისებაში. თუ გაქვთ დიაბეტი, კალირას მიღებისას მნიშვნელოვანია დაიცვათ ექიმის მიერ რეკომენდებული დიეტის და ვარჯიშის პროგრამა.

სხვადასხვა ასაკობრივი ჯგუფები:

გამოყენება პედიატრიაში:

კალირას გამოყენება რეკომენდებული არ არის ბავშვებში და 18 წლამდე ასაკის მოზარდებში, ვინაიდან აღნიშნულ ჯგუფში არ არის შესწავლილი.

გამოყენება გერიატრიაში:

დოზის კორექცია საჭირო არ არის 65 წლის და უფროსი ასაკის პაციენტებში.

გამოყენება განსაკუთრებულ შემთხვევებში:

თირკმლის უკმარისობა:

არ არის საჭირო დოზის კორექცია თირკმლის ფუნქციის შესაბამისად.

თუ გაქვთ თირკმელების პრობლემები, კალირას გამოყენებამდე უნდა მიმართოთ ექიმს.

დაპაგლიფლოზინით თერაპიის დაწყება რეკომენდებული არ არის  თირკმლის მძიმე უკმარისობის მქონე პაციენტებში (კრეატინინის კლირენსი <25 მლ/წთ).

ტიპი 2 შაქრიანი დიაბეტის მქონე პაციენტებში, რომლებსაც აღენიშნებათ თირკმელების ზომიერი უკმარისობა (კრეატინინის კლირენსი <45 მლ/წთ), სისხლში შაქრის დონის გასაკონტროლებლად შეიძლება საჭირო გახდეს> შაქრის დამაქვეითებელი დამატებითი პრეპარატი.

ღვიძლის უკმარისობა:

ღვიძლის მსუბუქი ან ზომიერი უკმარისობის მქონე პაციენტებისთვის დოზის კორექცია საჭირო არ არის. ღვიძლის მძიმე უკმარისობის მქონე პაციენტებში რეკომენდებულია საწყისი დოზა 5 მგ, კარგი ამტანობის შემთხვევაში, დოზა შეიძლება გაიზარდოს 10 მგ-მდე.

თუ გაქვთ შთაბეჭდილება, რომ კალირას ეფექტი ძალიან ძლიერი ან ძალიან სუსტია, მიმართეთ თქვენს ექიმს ან ფარმაცევტს.

თუ მიიღეთ საჭიროზე მეტი კალირა

თუ გამოიყენეთ საჭიროზე მეტი კალირა, დაუყოვნებლივ მიმართეთ ექიმს ან ფარმაცევტს.

თუ დაგავიწყდათ კალირას მიღება

რა უნდა გააკეთოთ, თუ დაგავიწყდათ ტაბლეტის მიღება, დამოკიდებულია იმაზე, თუ რამდენი დრო გავიდა მომდევნო დოზის მიღებამდე.

• თუ მომდევნო დოზის მიღებამდე დარჩენილია 12 საათი ან მეტი, მიიღეთ კალირას დოზა გახსენებისთანავე. შემდეგი დოზა მიიღეთ  ჩვეულ დროს.

• გამოტოვეთ დოზა, თუ მომდევნო დოზის მიღებამდე დარჩენილია 12 საათზე ნაკლები.  შემდეგი დოზა მიიღეთ ჩვეულ დროს.

არ მიიღოთ ორმაგი დოზა გამოტოვებული დოზის ასანაზღაურებლად.

ეფექტები, რომლებიც შეიძლება აღინიშნოს კალირათი მკურნალობის შეწყვეტისას

კალირას გამოყენება  არ შეწყვიტოთ ექიმთან კონსულტაციის გარეშე. თუ გაქვთ დიაბეტი, სისხლში შაქრის დონე შეიძლება გაიზარდოს ამ მედიკამენტის მიღების გარეშე.

თუ თქვენ გაქვთ დამატებითი შეკითხვები ამ მედიკამენტის გამოყენებასთან დაკავშირებით, მიმართეთ თქვენს ექიმს, ფარმაცევტს ან ექთანს.

4. რა არის შესაძლო გვერდითი ეფექტები?

ყველა მედიკამენტის მსგავსად, შესაძლებელია გვერდითი მოვლენების განვითარება  კალირას შემადგენლობაში შემავალი ინგრედიენტების მიმართ მგრძნობიარე პირებში.

 გვერდითი ეფექტები ჩამოთვლილია შემდეგ კატეგორიებში:

ძალიან ხშირი: შესაძლოა აღენიშნოს 10-დან არანაკლებ 1 პაციენტს.

ხშირი: შესაძლოა აღენიშნოს 10-დან 1-ზე ნაკლებ, მაგრამ 100-დან 1 ან მეტ პაციენტს.

ნაკლებად ხშირი: შესაძლოა აღენიშნოს 100-დან 1-ზე ნაკლებ, მაგრამ 1 000-დან 1 ან მეტ პაციენტს.

იშვიათი: შესაძლოა აღენიშნოს 1 000-დან 1-ზე ნაკლებ, მაგრამ 10 000-დან 1 ან მეტ პაციენტს.

ძალიან იშვიათი: შესაძლოა აღენიშნოს 10 000-დან 1-ზე ნაკლებ პაციენტს.

სიხშირე უცნობია: არსებული მონაცემებით შეფასება შეუძლებელია.

შეწყვიტეთ კალირას გამოყენება და დაუყოვნებლივ აცნობეთ ექიმს ან მიმართეთ უახლოეს საავადმყოფოს თუ შენიშნეთ შემდეგი გვერდითი მოვლენები:

ძალიან იშვიათი

• ანგიონევროზული შეშუპება

ანგიონევროზული შეშუპების ნიშნები:

- სახის, ენის ან ყელის შეშუპება,

- ყლაპვის გაძნელება

- ჭინჭრის ციება და სუნთქვის პრობლემები

იშვიათი:

• დიაბეტური კეტოაციდოზი (ტიპი 2 შაქრიანი დიაბეტის მქონე პაციენტებში)

დიაბეტური კეტოაციდოზის ნიშნებია:

- „კეტონური სხეულების" დონის მომატება შარდში ან სისხლში

- გულისრევა ან ღებინება

- მუცლის ტკივილი

- ძლიერი წყურვილი

- სწრაფი და ღრმა სუნთქვა

- დაბნეულობა (მოთენთილობა)

- უჩვეულო ძილიანობა ან დაღლილობა

- უჩვეულო სუნი ამოსუნთქვისას, ტკბილი ან ლითონის გემო პირში, ან განსხვავებული სუნი შარდში ან ოფლში

- წონის სწრაფი კლება

ეს ყოველივე შეიძლება განვითარდეს სისხლში შაქრის დონის მიუხედავად. ექიმმა შეიძლება დროებით ან სამუდამოდ შეწყვიტოს თქვენი მკურნალობა კალირათი.

შორისის ნეკროზული ფასციიტი ან ფურნიეს განგრენა არის გენიტალიების ან გენიტალიებსა და ანუსს შორის რბილი ქსოვილების ძალიან იშვიათი, სერიოზული ინფექცია.

ეს ყველაფერი ძალიან სერიოზული გვერდითი ეფექტებია.

თუ რომელიმე მათგანი თქვენ გეხებათ, სახეზეა კალირაზე სერიოზული ალერგია. შეიძლება დაგჭირდეთ სასწრაფო სამედიცინო დახმარება ან ჰოსპიტალიზაცია.

თუ შეამჩნევთ რომელიმე ქვემოთ ჩამოთვლილთაგანს, დაუყოვნებლივ აცნობეთ ექიმს ან მიმართეთ უახლოეს საავადმყოფოს სასწრაფო დახმარების განყოფილებას:

ხშირი:

• საშარდე გზების ინფექცია

საშარდე გზების მძიმე ინფექციის სიმპტომები:

- ცხელება და/ან შემცივნება

- წვის შეგრძნება შარდვისას

- ზურგის ან გვერდის ტკივილი

მიუხედავად იმისა, რომ ხშირი არ არის, თუ შარდში სისხლს შეამჩნევთ, დაუყოვნებლივ აცნობეთ ექიმს.

ეს ყველაფერი სერიოზული გვერდითი ეფექტებია.

შეიძლება საჭირო გახდეს სასწრაფო სამედიცინო დახმარება.

აცნობეთ თქვენს ექიმს, თუ შენიშნავთ რომელიმე ქვემოთ ჩამოთვლილთაგანს:

ძალიან ხშირი:

• შაქრის დაბალი დონე სისხლში (ჰიპოგლიკემია) დიაბეტით დაავადებულ პაციენტებში, რომლებიც იღებენ ამ მედიკამენტს სულფონილშარდოვანას ან ინსულინთან ერთად

სისხლში შაქრის დაბალი დონის:

- კანკალი, ოფლიანობა, შფოთვის შეგრძნება, აჩქარებული გულისცემა

- შიმშილის გრძნობა, თავის ტკივილი, მხედველობის ცვლილება

- განწყობის შეცვლა ან დაბნეულობა

მკურნალი ექიმი გირჩევთ, თუ როგორ უმკურნალოთ სისხლში შაქრის დაბალ დონეს ან რა უნდა გააკეთოთ ზემოთ აღწერილი ნებისმიერი ნიშნის განვითარების შემთხვევაში.

კალირას სხვა გვერდითი ეფექტებია:

ძალიან ხშირი:

• ჰიპოგლიკემია (თუ თქვენ იღებთ სხვა მედიკამენტებს, რომლებიც ამცირებენ შაქრის დონეს სისხლში, როგორიცაა ინსულინი ან "სულფონილშარდოვანას" მედიკამენტი)

ხშირი:

• პენისის ან საშოს ინფექცია (რძიანა) (სიმპტომები შეიძლება იყოს გაღიზიანება, ქავილი, მოულოდნელი გამონადენი ან სუნი)

• საშარდე გზების ინფექცია

• ზურგის ტკივილი

• ჩვეულებრივზე მეტი შარდის გამოყოფა ან უფრო ხშირად მოშარდვის სურვილი

• სისხლში ცხიმების ან ქოლესტერინის დონის ცვლილებები (გამოვლენილი ანალიზებით)

• სისხლის წითელი უჯრედების რაოდენობის ზრდა (გამოვლენილი ანალიზებით)

• კრეატინინის თირკმლისმიერი კლირენსის დაქვეითება მკურნალობის დაწყებისას (გამოვლენილია ანალიზებით)

• თავბრუსხვევა

• გამონაყარი

ნაკლებად ხშირი:

• სოკოვანი ინფექცია

• თქვენი ორგანიზმიდან სითხის გადაჭარბებული დაკარგვა (დეჰიდრატაცია, სიმპტომები შეიძლება მოიცავდეს ძლიერ სიმშრალეს ან წებოვნებას პირის ღრუში, მცირე რაოდენობით შარდის გამოყოფას ან შარდის არ გამოყოფას, ან აჩქარებული გულისცემას)

• წყურვილის შეგრძნება

• ყაბზობა

• გახშირებული შარდვა ღამით

• პირის სიმშრალე

• ქავილი სასქესო ორგანოში

• წონის კლება

• კრეატინინის მატება მკურნალობის დაწყებისას (გამოვლენილია სისხლის ლაბორატორიული ანალიზებით)

• შარდოვანას მატება მკურნალობის დასაწყისში (გამოვლენილია სისხლის ლაბორატორიული ანალიზებით)

ძალიან იშვიათი:

• შორისის ნეკროზული ფასციიტი ან ფურნიეს განგრენა (რბილი ქსოვილების ძალიან იშვიათი, სერიოზული ინფექცია სასქესო ორგანოებში ან სასქესო ორგანოებსა და ანუსს შორის)

• ანგიონევროზული შეშუპება  (სახის, ენის ან ყელის შეშუპება, ყლაპვის გაძნელება, ჭინჭრის ციება და სუნთქვის პრობლემები)

• თირკმლის ანთება (ტუბულოინტერსტიციული ნეფრიტი)

თუ თქვენ გაქვთ რაიმე გვერდითი ეფექტი, რომელიც არ არის აღნიშნული ამ ინსტრუქციაში, აცნობეთ თქვენს ექიმს ან ფარმაცევტს.

გვერდითი ეფექტების შესახებ შეტყობინება:

დაელაპარაკეთ თქვენს ექიმს, ფარმაცევტს ან ექთანს ნებისმიერი გვერდითი ეფექტის შემთხვევაში, რომელიც შედის ან არ არის გამოყენების ინსტრუქციაში.წარმოქმნილი გვერდითი ეფექტების შეტყობინებით, თქვენ წვლილი შეიტანთ მეტი ინფორმაციის მიღებაში იმ პრეპარატის უსაფრთხოების შესახებ, რომელსაც იყენებთ.

5. როგორ ინახება კალირა

შეინახეთ პირველად შეფუთვაში ბავშვებისთვის მიუწვდომელ ადგილას.

გამოიყენეთ ვარგისობის ვადის შესაბამისად.

არ გამოიყენოთ კალირა  ბლისტერზე და მუყაოზე მითითებული ვარგისიანობის ვადის გასვლის შემდეგ.

ვარგისიანობის ვადა ეხება მითითებული თვის ბოლო დღეს.

პრეპარატი ინახება 25°C-ის ქვემოთ, ოთახის ტემპერატურაზე.

არ გამოიყენოთ კალირა, თუ შეამჩნევთ რაიმე დეფექტს პროდუქტს და/ან მის შეფუთვას.

არ გადააგდოთ ვადაგასული ან გამოუყენებელი მედიკამენტები! გადაეცით გარემოს დაცვისა და ურბანიზაციის სამინისტროს მიერ განსაზღვრულ შეგროვების სისტემას.

გაცემის წესი:

ფარმაცევტული პროდუქტის ჯგუფი II, გაიცემა ფორმა №3 რეცეპტით