გლიკლადა - Gliclada 60მგ 60 ტაბლეტი

გლიკლადა® 60 მგ მოდიფიცირებული გამოთავისუფლების ტაბლეტები

გლიკლაზიდი

პრეპარატის გამოყენებამდე ყურადღებით წაიკითხეთ მთლიანი გამოყენების ინსტრუქვია, რადგან ის შეიცავს თქვენთვის მნიშვნელოვან ინფორმაციებს.

-  შეინახეთ ეს ინსტრუქცია. შესაძლოა მოგვიანებით კიდევ დაგჭირდეთ მისი წაკითხვა.

-  დამატებითი კითხვების შემთხვევაში, მიმართეთ ექიმს ან ფარმაცევტს.

-  ეს მედიკამენტი დაგენიშნათ თქვენ ინდივიდუალურად. ნუ გადასცემთ მას სხვას გამოყენებისათვის, რადგან პრეპარატმა შესაძლოა ზიანი მიაყენოს მას იმ შემთხვევაშიც კი, თუ მასაც აღენიშნება თქვენი დაავადების მსგავსი სიმპტომები.

-  თუ შენიშნავთ ნებისმიერ გვერდით ეფექტს, მიმართეთ ექიმს ან ფარმაცევტს. ეს ეხევა ასევე ნებისმიერი შესაძლო გვერდით მოვლენას, რომელიც არ არის აღწერილი ამ ინსტრუქციაში. იხილეთ ნაწილი 4.

გამოყენების ინსტრუქცია შეიცავს:

1. რას წარმოადგენს გლიკლადა და რისთვის გამოიყენება

2. ინფორმაცია გლიკლადას გამოყენებამდე

3. გლიკლადას გამოყენების წესი

4. მოსალოდნელი გვერდითი ეფექტები

5. გლიკლადას შენახვის პირობები

6. შეფუთვის შემცველობა და დამატებითი ინფორმაციები

1. რას წარმოადგენს გლიკლადა და რისთვის გამოიყენება

გლიკლადა არის პერორალური ანტიდიაბეტური პრეპარატი, რომელიც მიეკუთვნება სულფონილშარდოვანას ჯგუფს.

გლიკლადა გამოიყენება დიაბეტის გარკვეული ფორმის (მე-2 ტიპის შაქრიანი >დიაბეტი) სამკურნალოდ მოზრდილებში, როდესაც მხოლოდ დიეტა, ვარჯიში და წონის დაკლება არ არის საკმარისი სისხლში შაქრის ნორმალური დონის შესანარჩუნებლად.

2. ინფორმაცია გლიკლადას გამოყენებამდე

არ შეიძლება გლიკლადას გამოყენება

-  თუ გაქვთ ალერგია გლიკლაზიდის ან ამ პრეპარატის სხვა რომელიმე ინგრედიენტის მიმართ (ჩამოთვლილია ნაწილში 6) ან იმავე ჯგუფის სხვა პრეპარატების მიმართ (სულფონილშარდოვანას წარმოებულები) ან სხვა მონათესავე პრეპარატების მიმართ (სისხლში შაქრის დამწევი სულფონამიდები)

-  თუ გაწუხებთ ინსულინზე დამოკიდებული დიაბეტი (ტიპი 1);

-  თუ შარდში აღინიშნება კეტონური სხეულები და შაქარი (ეს შეიძლება მიუთითებდეს დიაბეტურ კეტოაციდოზზე), თუ ვლინდება დიაბეტური პრეკომა ან კომა;

-  თუ გაქვთ თირკმლის ან ღვიძლის მძიმე დაავადება;

-  თუ იღებთ სოკოვანი ინფექციების სამკურნალო პრეპარატებს (მიკონაზოლი, იხილეთ ნაწილი „სხვა პრეპარატების მიღება“);

-  თუ ძუძუთი კვებავთ ბავშვს (იხილეთ ნაწილი „ორსულობა და ძუძუთი კვება“).

გაფრთხილებები და სიფრთხილის ზომები

გლიკლადას მიღებამდე მიმართეთ ექიმს ან ფარმაცევტს.

სისხლში შაქრის რეკომენდებული დონის მისაღწევად უნდა დაიცვათ ექიმის მიერ დანიშნული მკურნალობის გეგმა. ეს ნიშნავს, რომ ტაბლეტების რეგულარული მიღების გარდა, უნდა დაიცვათ კვების რეჟიმი, ივარჯიშოთ და, საჭიროების შემთხვევაში, დაიკლოთ წონაში.

გლიკლაზიდით მკურნალობის დროს აუცილებელია სისხლში (და შესაძლოა შარდში) შაქრის დონის და ასევე გლიკირებული ჰემოგლობინის (HbA1c) რეგულარული მონიტორინგი.

მკურნალობის პირველი რამდენიმე კვირის განმავლობაში შეიძლება გაიზარდოს სისხლში შაქრის დონის დაქვეითების (ჰიპოგლიკემიის) რისკი. ამიტომ, სასიცოცხლოდ მნიშვნელოვანია, რომ ექიმის მეთვალყურეობის ქვეშ იმყოფებოდეთ.

სისხლში შაქრის დაბალი დონე (ჰიპოგლიკემია) შეიძლება განვითარდეს:

-  თუ არარეგულარულად იღებთ საკვებს ან საერთოდ გამოტოვებთ მასას,

-  თუ შიმშილობთ,

-  თუ არასრულფასოვნად იკვებებით,

-  თუ შეიცვლით დიეტას,

-  თუ ზრდით ფიზიკურ აქტივობას ნახშირწყლების მიღების შესაბამისი გაზრდის გარეშე,

-  თუ სვამთ ალკოჰოლს, განსაკუთრებით კვების გამოტოვებასთან ერთად,

-  თუ ერთდროულად იღებთ სხვა მედიკამენტებს ან ბუნებრივ საშუალებებს,

-  თუ იღებთ გლიკლაზიდის ძალიან მაღალ დოზებს,

-  თუ გაწუხებთ კონკრეტული ჰორმონებით გამოწვეული დარღვევები (ფარისებრი ჯირკვლის, ჰიპოფიზის ან თირკმელზედა ჯირკვლის ქერქის ფუნქციური დარღვევები),

-  თუ თქვენი თირკმლის ან ღვიძლის ფუნქცია მკვეთრად არის დაქვეითებული.

თუ გაქვთ სისხლში შაქრის დაბალი დონე, შესაძლოა აღინიშნოს შემდეგი სიმპტომები: თავის ტკივილი, შიმშილის გრძნობის მომატება, გულისრევა, ღებინება, დაღლილობა, ძილის დარღვევა, მოუსვენრობა, აგრესიულობა, კონცენტრაციის დაქვეითება, ყურადღებისა და რეაქციის დროის შემცირება, დეპრესია, დაბნეულობა, მეტყველებისა და მხედველობის დარღვევები, ტრემორი, სენსორული დარღვევები, თავბრუსხვევა და უმწეობის შეგრძნება.

ასევე შეიძლება გამოვლინდეს შემდეგი ნიშნები და სიმპტომები: ოფლიანობა, კანის სველი ფენები, შფოთვა, გულისცემის გახშირება ან არარეგულარული რიტმი, მაღალი არტერიული წნევა და გულმკერდის არეში უეცარი ძლიერი ტკივილი, რომელიც შეიძლება გავრცელდეს მიმდებარე ადგილებში (სტენოკარდია).

თუ სისხლში შაქრის დონე კვლავ დაეცემა, შეიძლება განიცადოთ მნიშვნელოვანი დაბნეულობა (დელირიუმი), განვითარდეს კრუნჩხვები, დაკარგოთ თვითკონტროლი, სუნთქვა შეიძლება იყოს ზედაპირული და გულისცემა შენელებული, შეიძლება დაკარგოთ გონება, რამაც შესაძლოა გამოიწვიოს კომა. სისხლში შაქრის დონის მკვეთრი შემცირების კლინიკური სურათი შეიძლება ინსულტის სურათს ჰგავდეს.

უმეტეს შემთხვევაში, სისხლში შაქრის დაბალი დონის სიმპტომები ძალიან სწრაფად ქრება შაქრის რაიმე ფორმის მიღებისას (მაგ., გლუკოზის ტაბლეტები, შაქრის კუბიკები, ტკბილი წვენი, დატკბილული ჩაი).

ამიტომ, ყოველთვის თან უნდა ატაროთ შაქრის რაიმე ფორმა (გლუკოზის ტაბლეტები, შაქრის კუბიკები). გახსოვდეთ, რომ ხელოვნური დამატკბობლები არ არის ეფექტური. თუ შაქრის მიღება არ დაგეხმარებათ ან თუ სიმპტომები განმეორდება, გთხოვთ, დაუკავშირდეთ ექიმს ან უახლოეს საავადმყოფოს. სისხლში შაქრის დაბალი დონის სიმპტომები შეიძლება არ გამოვლინდეს, ან ნაკლებად გამოხატული იყოს ან ძალიან ნელა განვითარდეს, ან დროულად ვერ შეამჩნიოთ, რომ თქვენი სისხლში შაქრის დონე დაეცა. ამ მოვლენას შესაძლოა ადგილი ჰქონდეს მაშინ, თუ თქვენ ხართ ხანდაზმული პაციენტი და იღებთ გარკვეულ მედიკამენტებს (მაგ., ცენტრალურ ნერვულ სისტემაზე მოქმედ მედიკამენტებს და ბეტა-ბლოკატორებს). ეს ასევე შეიძლება აღინიშნოს ენდოკრინული სისტემის გარკვეული დარღვევების დროს (მაგ., ფარისებრი ჯირკვლის ფუნქციის და წინა ჰიპოფიზის ან ადრენოკორტიკალური უკმარისობის გარკვეული დარღვევები).

თუ სტრესულ სიტუაციაში ხართ (მაგ., უბედური შემთხვევა, ქირურგიული პროცედურა, სიცხე და ა.შ.), ექიმმა შეიძლება დროებით ინსულინთერაპიაზე გადაგიყვანოთ.

სისხლში შაქრის მაღალი დონის (ჰიპერგლიკემიის) სიმპტომები შეიძლება გამოვლინდეს მაშინ, როდესაც გლიკლაზიდმა ჯერ კიდევ არ შეამცირა სისხლში შაქრის დონე საკმარისად, როდესაც არ იცავთ ექიმის მიერ დანიშნულ მკურნალობის გეგმას, თუ იღებთ კრაზანას (Hypericum perforatum) პრეპარატებს (იხილეთ ნაწილი „სხვა მედიკამენტები და გლიკლადა“) ან განსაკუთრებულ სტრესულ სიტუაციებში. სიმპტომები შეიძლება მოიცავდეს წყურვილს, ხშირ შარდვას, პირის სიმშრალეს, კანის სიმშრალეს, ქავილს, კანის ინფექციებს და შრომისუნარიანობის დაქვეითებას.

თუ ეს სიმპტომები გამოვლინდა, აუცილებლად მიმართეთ ექიმს ან ფარმაცევტს.

სისხლში გლუკოზის დონის დარღვევა (სისხლში შაქრის დაბალი და მაღალი დონე) შეიძლება განვითარდეს, როდესაც გლიკლაზიდი ერთდროულად ინიშნება ანტიბიოტიკების კლასთან, რომელსაც ფტორქინოლონები ეწოდება, განსაკუთებით ხანდაზმულ პაციენტებში. ამ შემთხვევაში, ექიმი შეგახსენებთ სისხლში გლუკოზის დონის მონიტორინგის მნიშვნელობას.

თუ თქვენ გაქვთ ან იცით, რომ გაქვთ მემკვიდრეობითი დაავადება, როგორიცაა გლუკოზა 6 ფოსფატ დეჰიდროგენაზას (G6PD) დეფიციტი (სისხლის წითელი უჯრედების დარღვევა), შეიძლება განვითარდეს ჰემოგლობინის დონის დაქვეითება და სისხლის წითელი უჯრედების დაშლა (ჰემოლიზური ანემია). ამ სამკურნალო საშუალების მიღებამდე მიმართეთ ექიმს.

მწვავე პორფირიის შემთხვევები აღწერილია სხვა სულფონილშარდოვანას პრეპარატების გამოყენებისას, პაციენტებში, რომლებსაც აქვთ პორფირია (მემკვიდრეობითი გენეტიკური დარღვევები, რომლებიც ხასიათდება პორფირინების ან პორფირინის წინამორბედების ორგანიზმში დაგროვებით).

ბავშვები და მოზარდები

გლიკლადას გამოყენება ბავშვებში არ არის რეკომენდებული მონაცემების ნაკლებობის გამო.

სხვა მედიკამენტები და გლიკლადა

აცნობეთ ექიმს ან ფარმაცევტს, თუ იღებთ, ბოლო დროს იღებდით ან შეიძლება მიიღოთ სხვა მედიკამენტები.

გლიკლაზიდის სისხლში შაქრის დამწევი ეფექტი შეიძლება გაძლიერდეს და სისხლში შაქრის დაბალი დონის ნიშნები გამოვლინდეს შემდეგი პრეპარატებიდან ერთ-ერთის მიღებისას:

-  სხვა მედიკამენტები, რომლებიც გამოიყენება სისხლში შაქრის მაღალი დონის სამკურნალოდ (პერორალური ანტიდიაბეტური საშუალებები, GLP 1 რეცეპტორის აგონისტები ან ინსულინი)

-  ანტიბიოტიკები (მაგ. სულფონამიდები, კლარითრომიცინი)

-  მაღალი არტერიული წნევის ან გულის უკმარისობის სამკურნალო მედიკამენტები (ბეტა-ბლოკატორები, აგფ ინჰიბიტორები, როგორიცაა კაპტოპრილი ან ენალაპრილი)

-  სოკოვანი ინფექციების სამკურნალო მედიკამენტები (მიკონაზოლი, ფლუკონაზოლი)

-  კუჭის ან თორმეტგოჯა ნაწლავის წყლულის სამკურნალო მედიკამენტები (H2 რეცეპტორების ანტაგონისტები)

-  დეპრესიის სამკურნალო მედიკამენტები (მონოამინოქსიდაზას ინჰიბიტორები)

-  ტკივილგამაყუჩებლები ან ანტირევმატული საშუალებები (ფენილბუტაზონი, იბუპროფენი)

-  ალკოჰოლის შემცველი მედიკამენტები

გლიკლაზიდის სისხლში გლუკოზის დამწევი ეფექტი შეიძლება შესუსტდეს და სისხლში შაქრის დონის მატება გამოვლინდეს შემდეგი პრეპარატებიდან ერთ-ერთის მიღებისას:

-  ცენტრალური ნერვული სისტემის დარღვევების სამკურნალო მედიკამენტები (ქლორპრომაზინი)

-  ანთების შემამცირებელი მედიკამენტები (კორტიკოსტეროიდები)

-  ასთმის სამკურნალო ან მშობიარობის დროს გამოსაყენებელი მედიკამენტები (ინტრავენური სალბუტამოლი, რიტოდრინი, ტერბუტალინი)

-  სარძევე ჯირკვლის დაავადებების, ძლიერი მენსტრუალური სისხლდენის და ენდომეტრიოზის სამკურნალო მედიკამენტები (დანაზოლი).

-  წმ. იოჰანეს ვორტის - Hypericum perforatum - კრაზანას პრეპარატები

სისხლში გლუკოზის დონის დარღვევა (სისხლში შაქრის დაბალი და მაღალი დონე) შეიძლება განვითარდეს, როდესაც ფლუოროქინოლონების სახელით ცნობილი ანტიბიოტიკების კლასის პრეპარატი მიიღება გლიკლადასთან ერთად, განსაკუთრებით ხანდაზმულ პაციენტებში.

გლიკლადამ შეიძლება გააძლიეროს სისხლის შედედების დამწევი მედიკამენტების (მაგ., ვარფარინის) ეფექტი.

სხვა სამკურნალო საშუალების მიღების დაწყებამდე მიმართეთ ექიმს. თუ საავადმყოფოში მოხვდებით, აცნობეთ სამედიცინო პერსონალს, რომ იღებთ გლიკლადას.

გლიკლადას მიღება საკვებთან, სასმელთან და ალკოჰოლთან ერთად

გლიკლადას მიღება შესაძლებელია საკვებთან და უალკოჰოლო სასმელებთან ერთად.

ალკოჰოლის მიღება არ არის რეკომენდებული, რადგან მას შეუძლია დიაბეტის კონტროლის არაპროგნოზირებადი ცვლილება.

ორსულობა და ძუძუთი კვება

გლიკლადას გამოყენება ორსულობის დროს რეკომენდებული არ არის. თუ ხართ ორსულად ან ძუძუთი კვებავთ ბავშვს, ფიქრობთ, რომ შეიძლება იყოთ ორსულად ან გეგმავთ ბავშვის ყოლას, მიმართეთ ექიმს, რათა მან დაგინიშნოთ უფრო შესაფერისი მკურნალობა.

გლიკლადას მიღება არ შეიძლება ძუძუთი კვების დროს.

ავტომობილისა და სხვა მექანიზმების მართვა

თქვენი კონცენტრაციის ან რეაქციის უნარი შეიძლება დაქვეითდეს, თუ სისხლში შაქრის დონე ძალიან დაბალია (ჰიპოგლიკემია) ან ძალიან მაღალია (ჰიპერგლიკემია), ან თუ ასეთი მდგომარეობების შედეგად განგივითარდებათ მხედველობის პრობლემები. გაითვალისწინეთ, რომ შეიძლება საფრთხე შეუქმნათ საკუთარ თავს ან სხვებს (მაგალითად, ავტომობილის მართვის ან სხვა მექანიზმების გამოყენებისას). გთხოვთ, მიმართოთ ექიმს, მიუხედავად იმისა შეგიძლიათ თუ არა ავტომობილის მართვა, თუ:

-  გაქვთ სისხლში შაქრის დაბალი დონის ხშირი ეპიზოდები (ჰიპოგლიკემია),

-  გაქვთ სისხლში შაქრის დაბალი დონის (ჰიპოგლიკემია) ნაკლები ან საერთოდ არ გაქვთ გამაფრთხილებელი ნიშნები.

გლიკლადა შეიცავს ლაქტოზას

თუ თქვენთვის ცნობილია, რომ გაქვთ ზოგიერთი შაქრის მიმართ აუტანლობა, ამ სამკურნალო პროდუქტის მიღებამდე მიმართეთ ექიმს.

3. გლიკლადას გამოყენების წესი

დოზირება

ეს მედიკამენტი უნდა მიიღოთ ყოველთვის ზუსტად ექიმის ან ფარმაცევტის დანიშნულების მიხედვით. თუ არ ხართ რაიმეში დარწმუნებული, მიმართეთ ექიმს ან ფარმაცევტს.

ექიმი განსაზღვრავს დოზას თქვენს სისხლში და შესაძლოა შარდში არსებული შაქრის დონის მიხედვით.  გარე ფაქტორების ცვლილებებმა (მაგ., წონის დაკლება, ცხოვრების წესის შეცვლა, სტრესი) ან სისხლში შაქრის დონის გაუმჯობესებამ შეიძლება მოითხოვოს გლიკლაზიდის დოზის კორექტირება.

რეკომენდებული დოზაა ½ -დან 2 ტაბლეტამდე (მაქსიმუმ 120 მგ) ერთხელ საუზმეზე. ეს დამოკიდებულია მკურნალობის მიმართ თქვენს რეაქციაზე.

თუ გლიკლადას მოდიფიცირებული გამოთავისუფლების ტაბლეტის კომბინირებული თერაპია დაიწყება მეტფორმინთან, ალფა გლუკოზიდაზას ინჰიბიტორთან, თიაზოლიდინედიონთან, დიპეპტიდილ პეპტიდაზა 4 ინჰიბიტორთან, GLP 1 რეცეპტორის აგონისტთან ან ინსულინთან, თქვენი ექიმი ინდივიდუალურად განსაზღვრავს თითოეული პრეპარატის შესაბამის დოზას.

თუ შეამჩნევთ, რომ სისხლში შაქრის დონე მაღალია, მიუხედავად იმისა, რომ მედიკამენტს დანიშნულებისამებრ იღებთ, უნდა მიმართოთ ექიმს ან ფარმაცევტს.

მიღების წესი

პერორალური გამოყენებისთვის.

ტაბლეტის გაყოფა შესაძლებელია თანაბარ დოზებად.

გადაყლაპეთ ნახევარი ტაბლეტი ან ტაბლეტი(ები) მთლიანად, დაღეჭვის ან დაქუცმაცების გარეშე.

მიიღეთ ტაბლეტი(ები) ჭიქა წყალთან ერთად საუზმის დროს (და სასურველია ყოველდღე ერთსა და იმავე დროს).

ტაბლეტის(ების) მიღების შემდეგ ყოველთვის უნდა მიიღოთ საკვები.

თუ მიიღეთ გლიკლადას საჭიროზე მეტი დოზა

თუ მიიღეთ ჭარბი დოზა, დაუყოვნებლივ დაუკავშირდით ექიმს ან უახლოესი საავადმყოფოს სასწრაფო დახმარების განყოფილებას. დოზის გადაჭარბების და სისხლში შაქრის დაბალი დონის (ჰიპოგლიკემიის) ნიშნები აღწერილია ნაწილში 2. სიმპტომების შემსუბუქება შესაძლებელია შაქრის (4-დან 6 ნატეხი) ან შაქრიანი სასმელის დაუყოვნებლივ მიღებით, რასაც მოჰყვება ნოყიერი წახემსება ან კვება. თუ პაციენტი უგონო მდგომარეობაშია, დაუყოვნებლივ აცნობეთ ექიმს ან გამოიძახეთ სასწრაფო დახმარება. იგივე უნდა გაკეთდეს, თუ ვინმემ, მაგალითად, ბავშვმა, შემთხვევით მიიღო პროდუქტი. უგონო მდგომარეობაში მყოფ პაციენტებს არ უნდა მიეცეთ საკვები ან სასმელი. უნდა უზრუნველყოფილი იყოს, რომ ყოველთვის იყოს წინასწარ ინფორმირებული პირი, რომელსაც შეუძლია სასწრაფო დახმარების შემთხვევაში ექიმთან დარეკვა.

თუ დაგავიწყდათ გლიკლადას მიღება

მნიშვნელოვანია, რომ წამალი ყოველდღიურად მიიღოთ, რადგან რეგულარული მკურნალობა უკეთეს შედეგს იძლევა.

თუმცა, თუ დაგავიწყდათ გლიკლადას დოზის მიღება, შემდეგი დოზა ჩვეულ დროს მიიღეთ. არ მიიღოთ ორმაგი დოზა გამოტოვებული დოზის ასანაზღაურებლად.

თუ შეწყვეტთ გლიკლადას მიღებას

ვინაიდან დიაბეტი, როგორც წესი, მთელი ცხოვრების განმავლობაში მკურნალობს, ამ პრეპარატის მიღების შეწყვეტამდე უნდა მიმართოთ ექიმს. ამ პრეპარატის მიღების შეწყვეტამ შეიძლება გამოიწვიოს სისხლში შაქრის დონის მომატება (ჰიპერგლიკემია), რაც ზრდის დიაბეტის გართულებების რისკს.

თუ ამ პრეპარატის გამოყენებასთან დაკავშირებით დამატებითი კითხვები გაგიჩნდებათ, მიმართეთ ექიმს ან ფარმაცევტს.

4. მოსალოდნელი გვერდით ეფექტები

ნებისმიერი მედიკამენტის მსგავსად ამ პრეპარატმაც შესაძლოა გამოიწვიოს გვერდითი ეფექტები, თუმცა არა ნებისმიერ პაციენტში.

გვერდითი მოვლენები შეფასებულია მათი გამოვლენის სიხშირის მიხედვით.

ხშირი (შესაძლოა გამოვლინდეს 10-დან 1-მდე ადამიანში):

ყველაზე ხშირად დაფიქსირებული გვერდითი მოვლენაა სისხლში შაქრის დაბალი დონე (ჰიპოგლიკემია) (სიმპტომებისა და ნიშნებისთვის იხილეთ ნაწილი „გაფრთხილებები და უსაფრთხოების ზომები“). მკურნალობის გარეშე ამ სიმპტომებმა შეიძლება გამოიწვიოს ძილიანობა, გონების დაკარგვა ან შესაძლოა კომა. თუ განვითარდა მძიმე ან გახანგრძლივებული ჰიპოგლიკემია, თუნდაც დროებით კონტროლდებოდეს შაქრის მიღებით, დაუყოვნებლივ უნდა მიმართოთ ექიმს.

არახშირი (ვლინდება 100-დან 1 -მდე ადამიანში):

საჭმლის მომნელებელი სისტემის დარღვევები

მუცლის ტკივილი, გულისრევა, ღებინება, საჭმლის მონელების დარღვევა, დიარეა და ყაბზობა. ეს ეფექტები მცირდება, როდესაც გლიკლადას მოდიფიცირებული გამოთავისუფლების ტაბლეტი მიიღება საკვებთან ერთად, რეკომენდებული დოზით.

იშვიათი (შესაძლოა გამოვლინდეს 1,000 -დან 1-მდე ადამიანში):

სისხლის დარღვევები

აღწერილია სისხლში უჯრედების რაოდენობის შემცირება (მაგ., თრომბოციტები, სისხლის წითელი და თეთრი უჯრედები), რამაც შეიძლება გამოიწვიოს სიფერმკრთალე, ხანგრძლივი სისხლდენა, სისხლჩაქცევები, ყელის ტკივილი და ცხელება. ეს სიმპტომები, როგორც წესი, ქრება მკურნალობის შეწყვეტის შემდეგ.

კანის დარღვევები

აღწერილია კანის რეაქციები, როგორიცაა გამონაყარი, სიწითლე, ქავილი, ჭინჭრის ციება, ბუშტუკები და ანგიონევროზული შეშუპება (ქსოვილების სწრაფი შეშუპება, როგორიცაა ქუთუთოები, სახე, ტუჩები, პირის ღრუ, ენა ან ყელი, რამაც შეიძლება გამოიწვიოს სუნთქვის გაძნელება). გამონაყარი შეიძლება გადაიზარდოს კანის ფართოდ გავრცელებულ ბუშტუკებში ან აქერცვლაში. ასეთ შემთხვევაში შეწყვიტეთ გლიკლადას მიღება, დაუყოვნებლივ მიმართეთ ექიმს და აცნობეთ, რომ იღებთ ამ პრეპარატს.

გამონაკლის შემთხვევებში, აღინიშა მძიმე ჰიპერმგრძნობელობის რეაქციების (DRESS) ნიშნები: თავდაპირველად გრიპის მსგავსი სიმპტომები და სახეზე გამონაყარი, რაც გადაიზარდა გავრცელებულ გამონაყარში მაღალი ტემპერატურით.  

ღვიძლის დაავადება

ღვიძლის ფუნქციური ტესტების დარღვევების ცალკეული შემთხვევები დაფიქსირდა, რამაც შეიძლება გამოიწვიოს კანისა და თვალების გაყვითლება. თუ ეს შეამჩნიეთ, დაუყოვნებლივ მიმართეთ ექიმს. სიმპტომები, როგორც წესი, ქრება პრეპარატის მიღების შეწყვეტის შემთხვევაში. ექიმი გადაწყვეტს მკურნალობის შეწყვეტას.

თვალის დარღვევები

შესაძლოა, მხედველობა ხანმოკლე დროით დაზიანდეს, განსაკუთრებით მკურნალობის დასაწყისში. ეს ეფექტი გამოწვეულია სისხლში შაქრის დონის ცვლილებით.

როგორც სხვა სულფონილშარდოვანას შემთხვევაში, ძალიან იშვიათად დაფიქსირდა შემდეგი გვერდითი მოვლენები (შეიძლება აღენიშნებოდეს 10,000-დან 1-მდე ადამიანს):

სისხლის უჯრედების რაოდენობის მკვეთრი ცვლილებების და სისხლძარღვების კედლების ალერგიული ანთების შემთხვევები, სისხლში ნატრიუმის დონის შემცირება (ჰიპონატრიემია) და ღვიძლის დისფუნქციის სიმპტომები (მაგ., სიყვითლე), რომლებიც შემთხვევათა უმრავლესობაში ქრება სულფონილშარდოვანას მიღების შეწყვეტის შემდეგ, მაგრამ ცალკეულ შემთხვევებში შეიძლება გამოიწვიოს სიცოცხლისთვის საშიში ღვიძლის უკმარისობა.

გვერდითი ეფექტების შეტყობინება

თუ თქვენ შენიშავთ ნებისმიერი სახის გვერდითი მოვლენას, მიმართეთ თქვენს ექიმს ან ფარმაცევტს. ეს ეხება ნებისმიერ შესაძლო გვერდით ეფექტს, რომელიც არ არის ჩამოთვლილი ამ ინსტრუქციაში.

გვერდითი მოვლენების შესახებ ინფორმაციის მიწოდებით თქვენ ხელს შეუწყობთ ამ მედიკამენტის უსაფრთხოების შესახებ მეტი ინფორმაციის მოპოვებას.

5. გლიკლადას შენახვის პირობები

ეს მედიკამენტი უნდა შეინახოთ ბავშვებისთვის მიუწვდომელ ადგილას.

არ გამოიყენოთ ეს სამკურნალო საშუალება ვარგისიანობის ვადის გასვლის შემდეგ, რომელიც მითითებულია ბლისტერსა და კოლოფზე „EXP“-ს შემდეგ. ვარგისიანობის ვადა ვრცელდება მოცემული თვის ბოლო დღემდე.

ეს მედიკამენტი არ საჭიროებს შენახვის განსაკუთრებულ პირობებს.

არ გადააგდოთ მედიკამენტები გამდინარე წყლებში ან საყოფაცხოვრებო ნარჩენებში. ჰკითხეთ ფარმაცევტს რჩევა, თუ როგორ გადაყაროთ გამოუყენებელი მედიკამენტები. ეს ზომები ხელს შეუწყობს გარემოს დაცვას.

6. შეფუთვის შემცველობა და დამატებითი ინფორმაციები

რას შეიცავს გლიკლადა

-  აქტიური ნივთიერებაა გლიკლაზიდი. თითოეული მოდიფიცირებული გამოთავისუფლების ტაბლეტი შეიცავს 60 მგ გლიკლაზიდს.

-  დამხმარე ნივთიერებებია ჰიპრომელოზა, ლაქტოზის მონოჰიდრატი, კოლოიდური უწყლო კაჟბადი და მაგნიუმის სტეარატი. იხილეთ ნაწილი 2 „გლიკლადა შეიცავს ლაქტოზას“.

გლიკლადას გარეგნული სახე და შეფუთვის შემცველობა

თეთრიდან თითქმის თეთრამდე, ოვალური, ორმხრივამოზნექილი ტაბლეტები, სიგრძით 13 მმ და სისქით 3.5 მმ - 4.9 მმ, ორივე მხარეს გამყოფი ზოლით. ტაბლეტის გაყოფა შესაძლებელია თანაბარ დოზებად.

გლიკლადას შეფუთვა შეიცავს 14, 15, 28, 30, 56, 60, 84, 90, 120 ან 180 მოდიფიცირებულ გამოთავისუფლების ტაბლეტს მუყაოს კოლოფში.

შესაძლოა, ყველა შეფუთვა არ იყოს გაყიდვაში.