გლიცეროლო - Glicerolo მიკროოყნა რექტალური ხსნარი 6.75გ 6 ცალი

გლიცეროლო ნოვა არგენტია 6.75 გ რექტალური ხსნარი მოზრდილებისთვის

გლიცეროლი

ამ მედიკამენტის გამოყენების დაწყებამდე ყურადღებით გაეცანით მთლიან გამოყენების ინსტრუქციას, რადგან ის შეიცავს თქვენთვის მნიშვნელოვან ინფორმაციას.

ყოველთვის მიიღეთ ეს მედიკამენტი ზუსტად ისე, როგორც აღწერილია ამ ინსტრუქციაში ან ისე, როგორც ექიმმა ან ფარმაცევტმა დაგინიშნათ.

-  შეინახეთ ეს ინსტრუქცია. შესაძლოა დაგჭირდეთ მისი ხელახლა წაკითხვა.

-  დამატებითი ინფორმაციის ან რჩევის საჭიროების შემთხვევაში მიმართეთ ფარმაცევტს.

-  თუ შეამჩნევთ რაიმე გვერდით მოვლენას, მიმართეთ ექიმს ან ფარმაცევტს. ეს მოიცავს ნებისმიერ შესაძლო გვერდით მოვლენას, რომელიც არ არის ჩამოთვლილი ამ ინსტრუქციაში. იხილეთ მე-4 ნაწილი.

-  აცნობეთ ექიმს, თუ თქვენი სიმპტომები არ გაუმჯობესდა ან გაუარესდა.

გამოყენების ინსტრუქცია შეიცავს:

1. რას წარმოადგენს გლიცეროლო ნოვა არგენტია და რისთვის გამოიყენება

2. ინფორმაცია გლიცეროლო ნოვა არგენტიას გამოყენებამდე

3. გლიცეროლო ნოვა არგენტიას გამოყენების წესი

4. მოსალოდნელი გვერდითი ეფექტები

5. გლიცეროლო ნოვა არგენტიას შენახვის პირობები

6. შეფუთვის შემადგენლობა და დამატებითი ინფორმაციები

1. რას წარმოადგენს გლიცეროლო ნოვა და რისთვის გამოიყენება

გლიცეროლო ნოვა არგენტია შეიცავს აქტიურ ნივთიერება გლიცეროლს, რომელიც მიეკუთვნება საფაღარათო საშუალებების ჯგუფს.

საფაღარათო საშუალება არის პრეპარატი, რომელიც გამოიყენება ნაწლავების დაცლის გასაადვილებლად. ეს სამკურნალო საშუალება ნაჩვენებია პერიოდული ყაბზობის ხანმოკლე მკურნალობისთვის.

აცნობეთ ექიმს, თუ თქვენი სიმპტომები არ გაუმჯობესდა ან გაუარესდა

2. ინფორმაცია გლიცეროლო ნოვა არგენტიას გამოყენებამდე

არ გამოიყენოთ გლიცეროლო ნოვა არგენტია:

-  თუ გაქვთ ალერგია გლიცერინის ან ამ პრეპარატის სხვა რომელიმე ინგრედიენტის მიმართ (იხილეთ ნაწილი 6);

-  თუ გაქვთ მწვავე ან აუხსნელი მუცლის ტკივილი;

-  თუ გრძნობთ გულისრევას ან ღებინებას;

-  თუ გაქვთ ნაწლავის გაუვალობა ან შევიწროება (სტენოზი);

-  თუ გაქვთ აუხსნელი სისხლდენა სწორი ნაწლავიდან;

-  თუ გაწუხებთ ანალური არეში სისხლძარღვების შეშუპება (მწვავე ჰემოროიდული კრიზისი) ტკივილითა და სისხლდენით;

-  თუ გაქვთ ძლიერი გაუწყლოება.

გაფრთხილებები და სიფრთხილის ზომები

გლიცეროლო ნოვა არგენტიას გამოყენებამდე მიმართეთ ექიმს ან ფარმაცევტს.

თუ თქვენ ხანდაზმული ხართ და/ან გაქვთ ჯანმრთელობის პრობლემები, ამ მედიკამენტის გამოყენებამდე აცნობეთ ექიმს.

საფაღარათო საშუალებების გამოყენება უნდა მოხდეს რაც შეიძლება იშვიათად და არავითარ შემთხვევაში 7 დღეზე მეტხანს. საფაღარათო საშუალებების ხანგრძლივი გამოყენებისთვის საჭიროა ექიმის დანიშნულება პაციენტის მდგომარეობის საფუძვლიანი შეფასების შემდეგ.

თუ გაწუხებთ მუდმივი (ქრონიკული) ან მორეციდივე ყაბზობა, ყოველთვის მიმართეთ ექიმს დიაგნოზის დასმის, მედიკამენტების დანიშვნისა და მკურნალობის მიმდინარეობის მონიტორინგისთვის.

საფაღარათო საშუალებების მიღებისას განავლის დარბილებისთვის ყოველდღიურად დალიეთ სულ მცირე 6-8 ჭიქა წყალი ან სხვა სითხე. საფაღარათო საშუალებების ჭარბმა, ხშირმა ან არასწორმა გამოყენებამ შეიძლება გამოიწვიოს მუდმივი დიარეა, რასაც თან ახლავს წყლის, მინერალების (განსაკუთრებით კალიუმის) და სხვა მნიშვნელოვანი საკვები ნივთიერებების დაკარგვა. მძიმე შემთხვევებში, ამან შეიძლება გამოიწვიოს წყლის ძლიერი დაკარგვა (დეჰიდრატაცია) ან სისხლში კალიუმის დონის დაქვეითება (ჰიპოკალიემია). ამან შეიძლება გავლენა მოახდინოს გულის ან კუნთების ფუნქციაზე, განსაკუთრებით თუ ამ მედიკამენტის მიღების დროს იღებთ გულის გლიკოზიდებს, შარდმდენებს ან კორტიკოსტეროიდებს.

საფაღარათო საშუალებების, განსაკუთრებით კონტაქტური საფაღარათო საშუალებების (მასტიმულირებელი საფაღარათო საშუალებების) ბოროტად გამოყენებამ შეიძლება გამოიწვიოს დამოკიდებულება (სულ უფრო მაღალი დოზების საჭიროება), ქრონიკული ყაბზობა და ნაწლავების ნორმალური ფუნქციის დაკარგვა (ნაწლავის ატონია).

თუ გაწუხებთ ყაბზობა, პირველ რიგში უნდა შეცვალოთ თქვენი დიეტა და უზრუნველყოთ ბოჭკოვანი ნივთიერებების და წყლის ადეკვატური დღიური მიღება.

ბავშვები

12 წლამდე ასაკის ბავშვებში გლიცეროლო ნოვა არგენტიას გამოყენებამდე მიმართეთ ექიმს.

ურთიერთქმედება სხვა სამკურნალო საშუალებებთან

აცნობეთ ექიმს ან ფარმაცევტს, თუ იღებთ, ბოლო დროს იღებდით ან შესაძლოა მიიღოთ სხვა მედიკამენტები.

სხვა სამკურნალო საშუალებებთან ურთიერთქმედების შესახებ ინფორმაცია არ არსებობს.

ორსულობა და ძუძუთი კვება

თუ ხართ ორსულად ან ძუძუთი კვებავთ ბავშვს, ფიქრობთ, რომ შესაძლოა იყოთ ორსულად ან გეგმავთ ბავშვის გაჩენას, ამ მედიკამენტის მიღებამდე მიმართეთ ექიმს ან ფარმაცევტს. ორსულობის ან ძუძუთი კვების დროს გამოიყენეთ ეს მედიკამენტი მხოლოდ აბსოლუტურად აუცილებლობის შემთხვევაში და ყოველთვის ექიმის უშუალო მეთვალყურეობის ქვეშ.

ავტომობილის მართვა და მექანიზმებთან მუშაობა

ეს მედიკამენტი არ მოქმედებს თქვენს ავტომობილის მართვის ან მექანიზმებთან მუშაობის უნარზე. თუმცა, აკონტროლეთ თქვენი რეაქცია მედიკამენტზე, რადგან შეიძლება განვითარდეს გვერდითი მოვლენები, რამაც შეიძლება დააქვეითოს თქვენი მართვის ან მექანიზმებთან მუშაობის უნარი.

3. გლიცეროლო ნოვა არგენტიას გამოყენების წესი

ეს მედიკამენტი ყოველთვის უნდა მიიღოთ ზუსტად ინსტრუქციაში მოცემული მითითებების ან თქვენი ექიმის ან ფარმაცევტის დანიშნულების მიხედვით. თუ რაიმეში არ ხართ დარწმუნებული, მიმართეთ ექიმს ან ფარმაცევტს.

რეკომენდებული კორექტული დოზა არის ყველაზე დაბალი დოზა, რომელიც უზრუნველყოფს ნაწლავების ნორმალურ მოქმედებას. დაიწყეთ რეკომენდებული მინიმალური დოზით.

რეკომენდებული დოზა მოზრდილებისა და მოზარდებისთვის არის ერთი 6.75 გ-იანი ერთჯერადი დოზის კონტეინერი საჭიროების მიხედვით, არა უმეტეს დღეში ერთხელ ან ორჯერ.

2-დან 11 წლამდე ასაკის ბავშვებისთვის რეკომენდებული დოზაა ერთი 2.25 გ-იანი ერთჯერადი დოზის კონტეინერი საჭიროების მიხედვით, არა უმეტეს დღეში ერთხელ ან ორჯერ.

საჭიროების შემთხვევაში, აპლიკატორის წვერი დაასველეთ (შეზეთეთ) მედიკამენტის წვეთით, სანამ მას სწორ ნაწლავში შეიყვანთ და დგუშს დააჭერთ.

დგუშზე დაჭერა განაგრძეთ წვერის გამოწევისას.

კონტეინერი განკუთვნილია მხოლოდ ერთჯერადი გამოყენებისთვის; დარჩენილი ხსნარი გადააგდეთ.

საფაღარათო საშუალებები გამოიყენეთ რაც შეიძლება იშვიათად და არა უმეტეს შვიდი დღისა (იხილეთ გაფრთხილებები და უსაფრთხოების ზომები).

დიდი რაოდენობით სითხის მიღება გაზრდის ამ პროდუქტის ეფექტს.

თუ მიიღეთ გლიცეროლო ნოვა არგენტიას საჭიროზე მეტი დოზა

თუ ამ პრეპარატს ძალიან ხშირად, ძალიან დიდხანს ან ძალიან დიდი დოზით მიიღებთ, შეიძლება განიცადოთ მუცლის ტკივილი და მუდმივი დიარეა. ეს იწვევს წყლის, მინერალების (განსაკუთრებით კალიუმის) და სხვა მნიშვნელოვანი საკვები ნივთიერებების დაკარგვას, რომლებიც საჭიროებენ აღდგენას (იხილეთ გაფრთხილებები და უსაფრთხოების ზომები).

ელექტროლიტური დისბალანსის სიმპტომებია წყურვილი, ღებინება, სისუსტე, შეშუპება (ოდემა), ძვლების პრობლემები (ოსტეომალაცია, ასევე ცნობილი როგორც ძვლების დარბილება) და სისხლში ალბუმინის დაბალი დონე (ჰიპოალბუმინემია).

თუ შემთხვევით მიიღეთ გლიცეროლო ნოვა არგენტიას ჭარბი დოზა, დაუყოვნებლივ მიმართეთ ექიმს ან მიმართეთ უახლოეს საავადმყოფოს.

თუ თქვენ გაქვთ რაიმე შეკითხვები ამ პრეპარატის გამოყენებასთან დაკავშირებით, მიმართეთ ექიმს ან ფარმაცევტს.

4. მოსალოდნელი გვერდითი ეფექტები

ნებისმიერი მედიკამენტის მსგავსად, ამ პრეპარატმაც შესაძლოა გამოიწვიოს გვერდითი მოვლენები, თუმცა არა ნებისმიერ პაციენტში.

შესაძლოა გამოვლინდეს შემდეგი გვერდითი ეფექტები:

უცნობია სიხშირე (სიხშირის დადგენა შეუძლებელია არსებული მონაცემების მიხედვით):

-  ტკივილი იზოლირებული სპაზმების ან მუცლის კოლიკის და დიარეის სახით, სითხისა და მინერალური მარილების (ელექტროლიტების) დაკარგვით, რაც უფრო ხშირია მძიმე ყაბზობის შემთხვევაში.

-  სწორი ნაწლავის გაღიზიანება.

გვერდითი მოვლენების შეტყობინება

თუ თქვენ შენიშნეთ რაიმე გვერდითი მოვლენა, მათ შორის ისეთი, რომელიც არ არის ჩამოთვლილი ამ ფურცელ-ჩანართში, მიმართეთ ექიმს ან ფარმაცევტს. 

გვერდითი მოვლენების შესახებ შეტყობინებით, თქვენ ხელს უწყობთ ამ მედიკამენტის უსაფრთხოების შესახებ მეტი ინფორმაციის მოპოვებას.

5. გლიცეროლო ნოვა არგენტიას შენახვის პირობები

ეს სამკურნალო საშუალება უნდა შეინახოთ ბავშვებისათვის მიუწვდომელ და შეუმჩნეველ ადგილას.

არ გამოიყენოთ მედიკამენტი ვარგისიანობის ვადის გასვლის შემდეგ, რომელიც მითითებულია შეფუთვაზე ,,Exp”. ვარგისიანობის ვადა ვრცელდება აღნიშნული თვის ბოლო დღემდე.

შეინახეთ საწყის შეფუთვაში, მჭიდროდ დახურულ მდგომარეობაში მედიკამენტის ნესტისგან დაცვის მიზნით და მოარიდეთ სითბოს პირდაპირ წყაროებს. არ ჩარეცხოთ სამკურნალო საშუალებები კანალიზაციაში და არ გადააგდოთ საყოფაცხოვრებო ნარჩენებთან ერთად. ჰკითხეთ ფარმაცევტს, თუ როგორ უნდა გადააგდოთ გამოუყენებელი მედიკამენტები. ეს ხელს შეუწყობს გარემოს დაცვას.

6. შეფუთვის შემადგენლობა და დამატებითი ინფორმაციები

რას შეიცავს გლიცეროლო ნოვა არგენტია

გლიცეროლო ნოვა არგენტია 2.25 გ რექტალური ხსნარი ჩვილებისთვის

-  აქტიური ნივთიერებაა: გლიცერინი. თითოეული ერთჯერადი ამპულა შეიცავს 2.25 გ გლიცერინს.

-  დამხმარე ნივთიერებებია: გვირილის ექსტრაქტი, ჭინჭრის ექსტრაქტი, კარტოფილის სახამებელი, გასუფთავებული წყალი.

გლიცეროლო ნოვა არგენტია 6.75 გ რექტალური ხსნარი მოზრდილებისთვის

-  აქტიური ნივთიერებაა: გლიცერინი. თითოეული ერთჯერადი შეფუთვა შეიცავს 6.75 გ გლიცერინს.

-  დამხმარე ნივთიერებებია: გვირილის ექსტრაქტი, ჭინჭრის ექსტრაქტი, კარტოფილის სახამებელი, გასუფთავებული წყალი.

გლიცეროლო ნოვა არგენტიას გარეგნული ფორმა და შეფუთვის შემცველობა

შეფუთვა შეიცავს რექტალური ხსნარის 6 ერთჯერადი დოზირებისათვის განკუთვნილ კონტეინერს.

ასევე, იხილეთ: >გლიცეროლო - Glicerolo საბავშვო მიკროოყნა 2.25გ 6 ცალი