დიკლოფლექსი გელი - Dicloflex Gel გამფრქვევით 5% 50გ

დიკლოფლექსი 5% გელი
DicloFLEX 5% gel 
ნატრიუმის დიკლოფენაკი/diclofenac sodium

მოცემული პრეპარატის გამოყენების დაწყებამდე ყურადღებით წაიკითხეთ სრული ჩანართი, რადგან ის შეიცავს თქვენთვის მნიშვნელოვან ინფორმაციას
მოცემული პრეპარატი ყოველთვის გამოიყენეთ ამ ჩანართის მითითებების ან თქვენი ექიმის ან ფარმაცევტის დანიშნულების ზუსტად დაცვით. 
-    შეინახეთ მოცემული ჩანართი. შეიძლება, კვლავ დაგჭირდეთ მისი გადაკითხვა. 
-    თუ დამატებითი ინფორმაცია ან რჩევა დაგჭირდათ, მიმართეთ თქვენს ფარმაცევტს.
-    რომელიმე არასასურველი სამკურნალწამლო რეაქციის გამოვლენის შემთხვევაში მიმართეთ თქვენს ექიმს ან ფარმაცევტს. ეს ეხება ნებისმიერ შესაძლო არასასურველ რეაქციას, რომელიც არ არის აღწერილი მოცემულ ჩანართში. იხ. პარაგრაფი 4.
-    თუ 7 დღის შემდეგ არ გრძნობთ თავს უკეთ ან თქვენი მდგომარეობა გაუარესდა, უნდა მიმართოთ სამედიცინო დახმარებისთვის

ჩანართის შინაარსი 
1.    რას წარმოადგენს დიკლოფლექსი 5% გელი და რისთვის გამოიყენება  
2.    რა უნდა იცოდეთ დიკლოფლექსი 5% გელის გამოყენებამდე
3.    როგორ გამოიყენება დიკლოფლექსი 5% გელი
4.    შესაძლო არასასურველი რეაქცია
5.    დიკლოფლექსი 5% გელის შენახვის პირობები
6.    შეფუთვის შიგთავსი და დამატებითი ინფორმაცია 

1. რას წარმოადგენს დიკლოფლექსი 5% გელი და რისთვის გამოიყენება  

დიკლოფლექსი 5% გელი არის სამკურნალო საშუალება> ტკივილგამაყუჩებელი და ანთების საწინააღმდეგო მოქმედებით (არასტეროიდული ანთების საწინააღმდეგო საშუალება - აასს). 

რისთვის გამოიყენება დიკლოფლექსი 5% გელი
ტკივილის, ანთებისა და შეშუპების ადგილობრივი სიმპტომური მკურნალობისთვის შემდეგი მდგომარეობების დროს:
- რბილი ქსოვილების რევმატული ხასიათის დაავადებები (მყესებისა და იოგების ანთება - ტენდინიტი, ტენდოვაგინიტი, ბურსიტი, მხრის მტკივნეული უმოძრაობა, კუნთებისა და სახსრების ანთება);
- კიდურებისა და ხერხემლის არეში სახსრების დეგენერაციული დაავადებები (მსხვილი და წვრილი სახსრების ართროზი); 
- სპორტული და საშინაო ტრავმები (ნაღრძობი, დაჟეჟილობა, დაჭიმულობა).

2. რა უნდა იცოდეთ დიკლოფლექსი 5% გელის გამოყენებამდე

არ გამოიყენოთ დიკლოფლექსი 5% გელი
-    თუ ხართ ალერგიული დიკლოფენაკის ან ამ პრეპარატის ნებისმიერი სხვა ინგრედიენტის მიმართ (ჩამოთვლილია პარაგრაფში 6);
-    ღია ჭრილობაზე, კანის დაზიანებულ უბნებზე, კანის ანთების ან ინფექციის კერებზე;
-    ლორწოვან გარსებზე; 
-    თუ აცეტილსალიცილის მჟავას (ასპირინი) ან სხვა არასტეროიდული ანთების საწინააღმდეგო საშუალებების მიღების ფონზე აღგენიშნებათ ასთმის შეტევა, ანთება ან სურდო; 
-    ბავშვებში და 12 წლამდე ასაკის მოზარდებში;
-    ორსულობის ბოლო სამი თვის განმავლობაში. 

გაფრთხილება და სიფრთხილის ზომები
მიმართეთ თქვენს ექიმს ან ფარმაცევტს დიკლოფლექსი 5% გელის გამოყენებამდე,   
-    თუ გაქვთ ასთმა, თივის ცხელება, ცხვირის პოლიპები (ცხვირის ლორწოვანი გარსის შეშუპება), ფილტვების ქრონიკული დაავადებები ან სასუნთქი გზების ქრონიკული ინფექციები (თივის ცხელების მსგავსი სიმპტომები); 
-    თუ გაქვთ ჰიპერმგრძნობელობა ნებისმიერი კლასის ანთების საწინააღმდეგო საშუალებების მიმართ, სხვა პაციენტებთან შედარებით, დიკლოფლექსი 5% გელის გამოყენებისას მომატებულია ასთმის შეტევების (როგორიცაა, მაგალითად, აუტანლობა ანალგეზიური საშუალებების მიმართ/ანალგეზიური ასთმა), კანისა და ლორწოვანი გარსების ადგილობრივი შეშუპების (როგორიცაა, მაგალითად, კვინკეს შეშუპება) ან ჭინჭრის ციების განვითარების რისკი. ამ პაციენტებში დიკლოფლექსი 5% გელის გამოყენება შეიძლება სიფრთხილის განსაზღვრული ზომების დაცვით და ექიმის შემდგომი დაკვირვებით. ეს ასევე ეხება პაციენტებს, რომლებსაც აღენიშნებათ ალერგიული რეაქციები სხვა სუბსტანციების მიმართ, რომლებიც ვლინდება კანის რეაქციების, ქავილის ან ჭინჭრის ციების სახით. 

საჭიროა სიფრთხილის ზომების დაცვა იმისათვის, რომ გელი არ მოხვდეს თვალში და ლორწოვან გარსებზე, ასევე არ იქნას მიღებული პერორალურად. 

სხვა პრეპარატები და დიკლოფლექსი 5% გელი
აცნობეთ თქვენს ექიმს ან ფარმაცევტს, თუ იღებთ, ახლო წარსულში იღებდით ან შეიძლება მიიღოთ სხვა სამკურნალო საშუალებები. 

ბავშვები და მოზარდები
დიკლოფლექსი 5% გელი არ უნდა გამოიყენოთ ბავშვებსა და 12 წლამდე ასაკის მოზარდებში, რადგან ამ ასაკობრივ ჯგუფში პრეპარატის გამოყენების საკმარისი მონაცემები არ არსებობს. 

ორსულობა, ძუძუთი კვება და ფერტილობა
თუ ხართ ორსულად ან ბავშვს ძუძუთი კვებავთ, ფიქრობთ, რომ ხართ ორსულად, ან გეგმავთ ორსულობას, მოცემული პრეპარატის გამოყენების დაწყებამდე რჩევისთვის მიმართეთ თქვენს ექიმს ან ფარმაცევტს. 

ორსულობა
ვინაიდან ორსულებში დიკლოფენაკის გამოყენების უსაფრთხოების შესახებ მონაცემები არასაკმარისია, დიკლოფლექსი 5% გელი არ უნდა გამოიყენოთ ორსულობის პერიოდში. დიკლოფლექსი 5% გელი განსაკუთრებით უკუნაჩვენებია ორსულობის ბოლო სამი თვის განმავლობაში. 

ძუძუთი კვება
ვინაიდან ცნობილი არ არის, გამოიყოფა თუ არა დიკლოფენაკი დედის რძეში ადგილობრივი გამოყენების დროს, მისი გამოყენება ძუძუთი კვების პერიოდში რეკომენდებული არ არის. თუ ძუძუთი კვების პერიოდში დიკლოფლექსი 5% გელის გამოყენება აუცილებელია, თავი უნდა შეიკავოთ მკერდის არეში წასმისგან და ხანგრძლივი გამოყენებისგან. 

სატრანსპორტო საშუალებების მართვა და მექანიზმებთან მუშაობა
მონაცემები სატრანსპორტო საშუალებების მართვის ან მექანიზმებთან მუშაობის დროს კონცენტრაციის უნარის დარღვევისა და რეაქციის დროის შეცვლის შესახებ არ არსებობს.  

დიკლოფლექსი 5% გელი შეიცავს სპირტს (იზოპროპილის სპირტს), ამიტომ დაუშვებელია კონტაქტი ღია ჭრილობასთან, ლორწოვან გარსებთან ან თვალებთან.
დიკლოფლექსი 5% გელი შეიცავს მეთილპარაჰიდროქსიბენზოატს დამხმარე ნივთიერების სახით, რომელიც შეიძლება იწვევდეს ალერგიულ რეაქციებს (შესაძლოა, შენელებული ტიპის). 
დიკლოფლექსი 5% გელი შეიცავს პროპილენგლიკოლს, რომელიც შეიძლება იწვევდეს კანის გაღიზიანებას. 

3. როგორ გამოიყენება დიკლოფლექსი 5% გელი

მოცემული პრეპარატი ყოველთვის გამოიყენეთ ამ ჩანართის მითითებების ან თქვენი ექიმის ან ფარმაცევტის დანიშნულების ზუსტად დაცვით. რაიმე საკითხზე ეჭვის არსებობის შემთხვევაში მიმართეთ თქვენს ექიმს ან ფარმაცევტს. 

დიკლოფლექსი 5% გელის თხელი ფენა უნდა წაისვათ კანის შესაბამის უბანზე  2-3-ჯერ დღეში. 

შეიზილეთ კანში. არ მიიღოთ პერორალურად. 

გამოყენების შემდეგ დაიბანეთ ხელები, გარდა იმ შემთხვევებისა, თუ პრეპარატს იყენებთ სამკურნალოდ ხელების არეში. 

დიკლოფლექსი 5% გელი შესაფერისია იონოფერეზით დაზიანების სამკურნალოდ. ამ ფორმის ელექტროთერაპია აუმჯობესებს კანში შეწოვას. დიკლოფლექსი 5% გელი უნდა წაისვათ უარყოფითი პოლუსის (კათოდის) შემთხვევაში.
პროდუქტის გამოყენება შეიძლება 3-დან 7-დღემდე, კონკრეტული შემთხვევიდან გამომდინარე. 

თუ გამოიყენეთ დიკლოფლექსი 5% გელის საჭიროზე მეტი დოზა
გელის რეკომენდებულზე მნიშვნელოვნად დიდი რაოდენობით წასმის ან პერორალურად მიღების შემთხვევაში დოზის გადაჭარბების სიმპტომები შეიძლება იყოს შემდეგი: თავბრუსხვევა, თავის ტკივილი, გონების დაკარგვა, სუნთქვის დარღვევა, გულისრევა, ღებინება, ტკივილი მუცლის არეში, სისხლდენა კუჭ-ნაწლავიდან, ღვიძლისა და თირკმელების ფუნქციის დარღვევა, ასევე კრუნჩხვები ბავშვებში. დაუყოვნებლივ აცნობეთ თქვენს ექიმს, რომელიც გაცნობილია კლინიკურ სურათთან დოზის გადაჭარბების მკურნალობისას. 
გელის წასმისას რეკომენდებული დოზის გადაჭარბებისას მოიშორეთ ის და ჩამოიბანეთ წყლით.

თუ გამოტოვეთ დიკლოფლექსი 5% გელის გამოყენება
თუ დაგავიწყდათ პრეპარატის წასმა, გააგრძელეთ მისი გამოყენება. კონსულტაციისთვის მიმართეთ თქვენს ექიმს, თუ არ ხართ დარწმუნებული მკურნალობის შეჩერების ან ვადამდე შეწყვეტის საკითხთან დაკავშირებით.  

ამ პროდუქტის გამოყენებასთან დაკავშირებით დამატებითი კითხვების არსებობის შემთხვევაში მიმართეთ თქვენს ექიმს ან ფარმაცევტს. 

4. შესაძლო არასასურველი რეაქციები

როგორც ყველა სამკურნალო საშუალებას, დიკლოფლექსი 5% გელსაც შეუძლია გამოიწვიოს არასასურველი რეაქციები, თუმცა ის არ ვითარდება ყველა პაციენტში.

ინფექციები
ძალიან იშვიათი (აღენიშნება 10 000 პაციენტიდან 1-ზე ნაკლებს): გამონაყარი ჩირქოვანი ბუშტუკებით (პუსტულები). 

იმუნური სისტემის დარღვევები
ძალიან იშვიათი (აღენიშნება 10 000 პაციენტიდან 1-ზე ნაკლებს): ალერგიული რეაქციები (ჭინჭრის ციების ჩათვლით), ადგილობრივი ანთება და ანგიონევროზული შეშუპება (ადგილობრივი შეშუპება კანზე, კანქვეშ და ლორწოვან გარსებზე). 

სუნთქვის დარღვევები
ძალიან იშვიათი (აღენიშნება 10 000 პაციენტიდან 1-ზე ნაკლებს): ასთმა.

დარღვევები კანისა და კანქვეშა ქსოვილების მხრივ
ხშირი (აღენიშნება 10 პაციენტიდან 1-ზე ნაკლებს): ანთება კანზე (კონტაქტური დერმატიტის ჩათვლით), გამონაყარი, სიწითლე და ქავილი. 
იშვიათი (აღენიშნება 1000 პაციენტიდან 1-ზე ნაკლებს): გამონაყარი ბუშტუკებით, რომლებიც შევსებულია სითხით (დიდი ზომის ბუშტუკები).
ძალიან იშვიათი (აღენიშნება 10000 პაციენტიდან 1-ზე ნაკლებს): ფოტომგრძნობელობის რეაქცია. 

თუ დიკლოფლექსი 5% გელს გამოიყენებთ კანის ფართო უბნებზე და ხანგრძლივი დროის განმავლობაში, არ შეიძლება გამოირიცხოს სისტემური არასასურველი სამკურნალწამლო რეაქციების გამოვლენა, რომლებიც გავრცელდება გარკვეულ ორგანოებსა და სისტემებზე ან მთლიანად ორგანიზმში და რომლებიც დიკლოფენაკის პერორალურად მიღებისას, ინტრამუსკულურად ან ინტრავენურად შეყვანისას გამოვლენილის ანალოგიურია. 

იმ შემთხვევაში, თუ შემთხვევით პერორალურად მიღებისას გელმა გამოიწვია სერიოზული სისტემური არასასურველი რეაქცია, უნდა მიიღოთ არასტეროიდული ანთების საწინააღმდეგო საშუალებებით მოწამვლისას ზოგადი სამკურნალო ზომები. ეს შეიძლება ითვალისწინებდეს კუჭის ამორეცხვას და აქტივირებული ნახშირის მიღებას, განსაკუთრებით, თუ მიღებიდან ცოტა დროა გასული. 

თუ რომელიმე არასასურველი სამკურნალწამლო რეაქცია სერიოზულ სახეს იღებს, ან შენიშნავთ სხვა არასასურველ რეაქციას, რომელიც არ არის აღწერილი მოცემულ ჩანართში, მიმართეთ თქვენს ექიმს ან ფარმაცევტს. 

შეტყობინება არასასურველი რეაქციების შესახებ
რომელიმე არასასურველი სამკურნალწამლო რეაქციის გამოვლენის შემთხვევაში მიმართეთ თქვენს ექიმს ან ფარმაცევტს. ეს ეხება ნებისმიერ შესაძლო არასასურველ რეაქციას, რომელიც არ არის აღწერილი მოცემულ ჩანართში. 
არასასურველი რეაქციების შესახებ შეტყობინების გაგზავნით შეგიძლიათ დახმარება ამ პრეპარატის უსაფრთხოების შესახებ მეტი ინფორმაციის მიღებაში. 

5. დიკლოფლექსი 5% გელის შენახვის პირობები

25°C-მდე ტემპერატურაზე, მშრალ და სინათლისგან დაცულ ადგილზე. 
ვარგისობის ვადა ალუმინის ტუბის პირველად გახსნის შემდეგ: 1 თვე. 

შეინახეთ ბავშვებისათვის მიუწვდომელ ადგილას!
 
მოცემული პრეპარატი არ გამოიყენოთ ვარგისობის ვადის გასვლის შემდეგ, რომელიც მითითებულია მუყაოს შეფუთვაზე წარწერა ~ვარგისია~-ს შემდეგ. ვარგისობის ვადის გასვლის თარიღი გულისხმობს მითითებული თვის ბოლო დღეს. 
 
სამკურნალო საშუალებების კანალიზაციის მილში ან საყოფაცხოვრებო ნაგავთან ერთად გადაგდება არ შეიძლება. 
არასაჭირო პრეპარატების უტილიზაციის საკითხთან დაკავშირებით მიმართეთ თქვენს ფარმაცევტს. ეს ზომები ხელს შეუწყობს გარემოს დაცვას.

გაცემის რეჟიმი:
ფარმაცევტული პროდუქტის ჯგუფი: III ჯგუფი, გაიცემა რეცეპტის გარეშე

6. შეფუთვის შიგთავსი და დამატებითი ინფორმაცია

რას შეიცავს დიკლოფლექსი 5% გელი
-    მოქმედი ნივთიერება: ნატრიუმის დიკლოფენაკი. 1 გ გელი შეიცავს 50 მგ ნატრიუმის დიკლოფენაკს. 
-    სხვა ინგრედიენტები (დამხმარე ნივთიერებები): კარბომერი, იზოპროპილის სპირტი, პროპილენგლიკოლი, მეთილპარაჰიდროქსიბენზოატი (E218), გასუფთავებული წყალი.

დიკლოფლექსი 5% გელის აღწერა და შეფუთვის შემადგენლობა
პრაქტიკულად თეთრი, გლუვი, ერთგვაროვანი, კრემის მაგვარი - გელი.
ხელმისაწვდომია ალუმინის ტუბში ან ჰერმეტულ შეფუთვაში 50 გ. 
ერთი ტუბი ან ჰერმეტული შეფუთვა მუყაოს კოლოფში, პაციენტისთვის განკუთვნილ ინფორმაციასთან ერთად. 
შეიძლება, გაყიდვაში ყველა ზომის შეფუთვა არ იყოს წარმოდგენილი. 

ასევე, იხილეთ: >Dicloflex - დიკლოფლექსი გელი 5% 50გ